Ադրբեջանական Day.az կայքի խմբագրություն ստացվել է մի նամակ, որում նշված է, որ Ժնևի խանութներում վաճառվում են Ադրբեջանի «օկուպացված» տարածքներում արտադրված ապրանքներ:
Նամակը հղել է Շվեյցարիայում բնակվող ադրբեջանցի Նամըք Գադիրովը: Վերջինս լուսանկարել է խանութներում վաճառվող Artsakh Fruit-ի պահածոները և որպես ապացույց՝ այդ լուսանկարներն ուղարկել նամակի հետ միասին:
Այդ պահածոների ապրանքանիշերի վրա նշված է, որ դրանք արտադրվել են Հայաստանում:
Հիշեցնենք, որ ադրբեջանական կողմը բազմիցս աղմուկ է բարձրացրել Artsakh Fruit-ի արտադրանքի հետ կապված: Հունվարին նշվում էր, թե ադրբեջանական կողմը դա հայտնաբերել է Կրասնոդարում, ինչից հետո նախագահ Ալիևը պատրաստվում էր անձամբ դիմել Ռուսաստանի ադրբեջանական համայնքին՝ բոյկոտելու Ստեփանակերտում գործող Artsakh Fruit-ի արտադրանքը: