Լրագրող Սիրանույշ Պապյանն ընդդեմ ոստիկանապետ Վովա Գասպարյանի հայցի հետ կապված՝ փաստաբանը նոր միջնորդություն է ներկայացրել դատարան:
«Առաջին լրատվական»- ի հետ զրույցում փաստաբան Դավիթ Ասատրյանը մանրամասնեց. «Դատարանը ժամանակ է տրամադրել դատավարության կողմերին, որպեսզի նրանք հնարավորություն ունենան հաշտության եզրեր գտնելու, սակայն արձանագրենք, որ ո՛չ հայցող կողմը, ո՛չ պատասխանող կողմը այդպիսի ցանկությամբ հանդես չի եկել: Ավելին՝ պատասխանող կողմը կտրուկ առարկեց՝ նշելով, որ որևէ հաշտության չի գնա: Այսինքն՝ աննախադեպ երկար ժամանակը, որ տրվել է դատարանի կողմից՝ 4 ամիս, դա անիմաստ է: Գտնում ենք, որ այս պարագայում արդար դատաքննության ողջամիտ ժամկետը պետք է օգտագործել, և միջնորդություն ենք ներկայացրել դատարան, որպեսզի դատարանը կրկին դատական նիստ նշանակի դեկտեմբերին»:
Փաստաբանը հավելեց, որ սովորաբար կողմերին հաշտության համար 1-1,5 ամիս ժամանակ է տրվում, բայց տրվում է կողմերի կարծիքը հաշվի առնելով, և եթե կողմերը չեն ցանկանում հաշտության պայամանագիր կնքել, բնականաբար 4 ամիս ժամանակ հատկացնելը անիմաստ է:
Դատական նիստերը, Դ. Ասատրյանի կարծիքով, հետաձգվում են միտումնավոր, դա արվում է այն նպատակով, որ դեպքը հասարակության և ԶԼՄ-ների մոտ մոռացության տրվի:
«Խճճելու եմ, չեմ թողնելու, դուք ձեր հայցը հետ եք վերցնելու». Վովա Գասպարյանի պաշտպանի՝ դատարանում արված այս արտահայտությանն անդրադառնալով՝ Դ. Ասատրյանը նշեց. «Պատասխանողի ներկայացուցչի վարքագիծը ամբողջովին համապատասխանում է պատասանող կողմի ներկայացրած հիմքերին և փաստարկներին, այսինքն՝ անհիմն է և բովանդակազուրկ, չկա որևէ իրավական հիմք, իրավական եզրակացություն: Այդպիսի արտահայտություններ անելով՝ պատասխանատվությունից խուսափելու գործելաոճ են որդեգրում: Այդ ամենը որակում եմ որպես իրավական ասելիք չունենալու հետևանք»:
Փաստաբանը նշեց, որ միջնորդությունը ներկայացնելուց հետո 2-3 օրվա ընթացքում դրա վերաբերյալ դատարանը պետք է հայտնի իր որոշման մասին: «Եթե դատարանը մերժի, մենք հետ չենք կանգնի, կրկին միջնորդություններ կներկայացնենք, որպեսզի դատական նիստը սկսվի ողջամիտ ժամկետում»,- նշեց Դ. Ասատրյանը:
Մանրամասները՝ տեսանյութում:
