«Նավասարդ» նախաձեռնող խումբը օգոստոսի 11-ին կկազմակերպի տոնակատարություններ՝ նվիրված Հայկ Նահապետի հաղթանակի և հայկական տոմարի 4505 ամյակին: Բացումը տեղի կունենա Գառնիի տաճարում:
Ինչպես լրագրողների հետ հանդիպմանն ասաց «Նավասարդ» նախաձեռնող խմբի ղեկավար Սամվել Հունանյանը, միջոցառումը կմեկնարկի հայոց զինանշաններով և հայերի գոյատևման ընթացքում եղած տասնմեկ դրոշներով՝ սկսած Հայկ Նահապետի դրոշից մինչև Արցախի դրոշը. «Հայկի հաղթանակը համամարդկային խորհուրդ ունի, որովհետև տապալվեց առաջին բռնատիրությունը։ Դա նաև լույսի, ազատության և արդարության հաղթանակ էր։ Հայ ընտանիքներում Նավասարդը մեծ շուքով է նշվել»:
Ինչպես նշեց ասուլիսի մյուս բանախոս պատմաբան Նորայր Եսայանը, նախաձեռնությանը միացել են «Մենք» ազգային արժեքների պահպանության հիմնադրամը, Եղիշե Չարենցի տուն-թանգարանը և մի շարք ՀԿ-ներ: Նա նշեց, որ ամբողջ տոնակատարության մեջ մեծ տեղ են հատկացվել թատերական խաղերին, ռազմական միջոցառումներին, ավանդական կերակուրների պատրաստմանը:
Նորայր Եսայանը հավաստեց նաև, որ մինչև քսաներորդ դարասկիզբը հայկական վիմական արձանագրությունները հայկական թվագրությամբ են գրվել, իսկ դրանից հետո հայկական տոմարը հետին պլան է մղվել. «Նավասարդի տոնի վերականգնումը շատ կարևոր է մեզ համար, քանի որ դրանով սկիզբ դրվեց մեր հաղթանակներին և հայկական տոմարին: Այն նշվել է բերքահավաքի բուռն շրջանում և միասնականաբար: Այժմ մենք պետք է վերականգնենք այդ տոնը և պահպանենք մեր ազգային արժեքները»:
