ԱՄՆ-ն ավելացնում է Աֆղանստան բեռների փոխադրումների քանակը Ռուսաստանի տարածքով այն բանից հետո, երբ սրվեցին հարաբերությունները ԱՄՆ-ի և Պակիստանի միջև:
Պենտագոնի առջև առաջադրանք է դրված Ռուսաստանի երկաթուղով ավելացնել Աֆղանստանի ամերիկյան զորքերի համար նախատեսված ռազմական բեռների տեղափոխումը` հասցնելով դրանք 75%-ի, հայտնել է ԱՄՆ ցամաքային զորքերի թիկունքի ապահովման շտաբի պետ Միթչել Սթիվենսոնը:
Ներկա պահին, ըստ նրա հայտնած տեղեկության, Հյուսիսային բաշխիչ ցանցի միջոցով, որով Մերձբալթյան շրջանից ռուսական, ղազախական և ուզբեկական տարածքներով բեռներ են տեղափոխվում Աֆղանստան, տեղափոխվում է ընդհանուր բեռների 60%-ը: Մնացած 40%-ը տեղափոխվում է Պակիստանով:
«Մեր նպատակը այդ ծավալները 75%-ի հասցնելն է»,- ИТАР-ТАСС գործակալության տեղեկացմամբ, ասել է Սթիվենսոնը:
Անցյալ շաբաթ հայտնի դարձավ Պակիստանի և Չինաստանի համագործակցության ընդլայնման մասին: Այս նոր համագործակցության առիթը Պակիստանի և ԱՄՆ միջև Բեն Լադենի հարցի շուրջ ծագած բազմաթիվ տարաձայնություններն են:
Ռուսաստանի տարածքով բեռների տեղափոխումը Աֆղանստան կապված է նաև Պակիստանի տարածքով դրանց տեղափոխման վտանգավոր լինելու հետ: Հանգստյան օրերին այդտեղ պայթեցվել է բենզտար մի մեքենա, որը նախատեսված էր Աֆղանստանում ամերիկյան զորքերի համար:
