Ջեյմս Ուորլիկի որպես Լեռնային Ղարաբաղի հակամարտության խաղաղ բանակցությունների գործընթացում Եվրոպայում Անվտանգության և Համագործակցության Կազմակերպության (ԵԱՀԿ) Մինսկի խմբի ամերիկացի նոր համանախագահ նշանակվելու առիթով, Ամերիկայի Հայկական Համագումարը (Համագումար) կրկին հայտնում է իր մտահոգությունները կապված Ադրբեջանի աճող ռազմատենչ հռետորաբանության, շարունակական ռազմականացման և հրադադարի խախտման դեպքերի հետ:
«Ամերիկայի Հայկական Համագումարը հույս է հայտնում, որ դեսպան Ուորլիկը և իր ԵԱՀԿ համանախագահող գործընկերները, կներգրավեն ժողովրդավարական ճանապարհով ընտրված Լեռնային Ղարաբաղի կառավարությանը խաղաղ բանակցություններին: Միայն ԼՂՀ կառավարության մասնակցությամբ և Լեռնային Ղարաբաղի քաղաքացիների աջակցության շնորհիվ, ովքեր խիզախորեն պաշտպանել են իրենց հայրենիքը, կարելի է հասնել տևական խաղաղության»,- հայտարարել է Ամերիկայի Հայկական Համագումարի գործադիր տնօրեն Բրայան Արդունին:
Պետքարտուղար Ջոն Քերրին արտահայտեց իր վստահությունը դեսպան Ուորլիկին` անվանելով նրան «առաջնակարգ դիվանագետ», երբ օգոստոսի 5-ին հայտարարեց նրա նշանակման մասին: Քերրին հիշեցրեց նաև, որ «Միացյալ Նահանգները հավատարիմ են մնում իրենց ձգտմանն օգնելով կողմերին հասնել Լեռնային Ղարաբաղի հակամարտության խնդրի հարատև և խաղաղ կարգավորմանը»:
1991 թվականին Ադրբեջանը պատերազմ սկսեց Լեռնային Ղարաբաղի հայ բնակչության դեմ: Ռուսաստանի միջնորդությամբ հրադադարի պայմանագիր ստորագրվեց 1994 թվականին, որով ավարտվեցին ռազմական գործողությունները։ Այնուամենայնիվ, խաղաղության պայմանագիր դեռևս չի հաստատվել: Մոտ 20 տարի է ԵԱՀԿ Մինսկի խումբը, որը համանախագահում են Միացյալ Նահանգները, Ռուսաստանը և Ֆրանսիան, հակամարտության խաղաղ լուծում է փնտրում: Վերջին տարիներին շփման գծի երկայնքով հրադադարի խախտման դեպքերն էապես աճել են: Միաժամանակ Ադրբեջանը սկսել է հսկայական քանակությամբ հարձակվողական զինատեսակներ գնել, որոնց գումարը 2011 -2012 ֆինանսական տարում կազմեց շուրջ 6 միլիարդ ԱՄՆ դոլար: Անցած ամիս հայտնի դարձավ, որ Ադրբեջանը սկսել է ստանալ Ռուսաստանից գնված 1 միլիարդ ԱՄՆ դոլար արժողությամբ զենք, մինչդեռ Միացյալ Նահանգների Կոնգրեսն Ադրբեջանի Զինված ուժերին լրացուցիչ 3.3 միլիոն ԱՄՆ դոլար տրամադրելու գործընթացում է: Ամերիկայի Հայկական Համագումարը բարձրաձայնեց այս խնդիրներն անցած ամսվա հաշվետվությունը ներկայացնելու ժամանակ, երբ Եվրոպայում Անվտանգության և Համագործակցության Հանձնաժողովի (ԱՄՆ Հելսինկյան Հանձնաժողովը) «Անհանգիստ գործընկեր. Ադրբեջանում աճող ավտորիտարիզմը» խորագրով լսումներն էին անցկացվում:
Ուորլիկը նախկինում եղել է ԱՄՆ-ի նախագահի հատուկ ներկայացուցիչը Աֆղանստանի ու Պակիստանի հարցերով և առաջատար բանակցող Աֆղանստանի հետ Երկկողմանի Անվտանգության Պայմանագիր կնքելու ժամանակ: Նա եղել է ԱՄՆ-ի դեսպան Բուլղարիայում 2009-2012թթ., պետքարտուղարի տեղակալի օգնական Միջազգային Կազմակերպության հարցերով բյուրոյում 2006-2009 թթ. և Եվրոպական Անվտանգության և Քաղաքական հարցերով գրասենյակի տնօրեն 2005-2006թթ.:
1972 թվին հիմնված` Ամերիկայի հայկական համագումարը Վաշինգտոնում տեղակայված խոշորագույն համազգային հասարակական կազմակերպություն է, որն օժանդակում է հայկական հարցերի ճիշտ ըմբռնմանն ու լուսաբանմանը: Համագումարը 501(c) (3) կարգավիճակով հարկերից ազատված անդամակցական կազմակերպություն է:
