«Փորձել են «մեղադրական» ապացույցներ բերել: Կան տեղեկություններ, որ Սմբատին մեղադրում են երկու ոստիկանների զոհվելու հարցով: Երկուսն էլ պետք է ապացուցի իսկական քննությունը: Կասկած չունեմ, որ այդ մեղադրանքներն անհիմն են, իրականությանը չեն համապատասխանում: Եվ թղթի վրա մեղադրանքներ մոգոնելով չէ, որ ապացուցվում է իսկական մեղադրանքը: Դա պետք է ապացուցել, և ես վստահ եմ, որ ապացուցելու հենք չկա և գնդապետ Վանոյանի զոհվելու կապակցությամբ, երկրորդը՝ սպանությամբ, որով մեղադրվում է Սմբատը: Ապացուցելու կարիք չկա, որ գնդապետ Վանոյանը զոհվել է գնդի տարածքում, և երկրորդ՝ ոստիկանը, ում մահվան մեղավորը համարվում է Սմբատը, բոլորի համար էլ պարզ է, որ շատ խիստ կասկածելի պայմաններում զոհվեց, և համարյա անհնարին է, որ գնդակն արձակված լինի գնդի տարածքից»,- «Առաջին լրատվական»-ի հետ զրույցում ասաց «Սասնա ծռեր» քաղաքական խորհրդի անդամ Ալեք Ենիգոմշյանը՝ անդրադառնալով Սմբատ Բարսեղյանին առաջադրված մեղադրանքին ՀՀ քրեական օրենսգրքի 218-րդ հոդվածի 3-րդ մասի 1-ին կետով, 235-րդ հոդվածի 3-րդ մասով, 238-րդ հոդվածի 4-րդ մասի 1-ին ու 2-րդ կետերով և 104-րդ հոդվածի 2-րդ մասի 1-ին, 2-րդ, 3-րդ և 11-րդ կետերով:
Ալեք Ենիգոմշյանը վստահ է, որ բերված հիմնավորումներն իրականությանը չեն համապատասխանում: Այս քայլով, ըստ նրա, փորձում են ցույց տալ, որ իբր իրենք աշխատանք են կատարել, արդյունքների հասել, ինչը իրականությանը չի համապատասխանում:
Արդյոք հնարավո՞ր է, որ տարեվերջին սպասվող համաներումը տարածվի «Սասնա ծռեր» խմբի անդամների վրա՝ հարցին Ալեք Ենիգոմշյանը պատասխանեց. «Մի բան հստակ է՝ այս վերջին օրերին մեղադրանքներն ավելացնելու, կոնկրետ «Սասնա ծռերի» անդամների մեղադրանքներն ավելացնելու միտում կա: Երեկ նաև հնչեց չարաբաստիկ դատախազության հայտարարությունը. հուլիսի 29-ին Սարի թաղի պետական ահաբեկչության զոհերը, որոնք չորս ամիս է, իրենք զոհ լինելով, անազատության մեջ են, եթե նախկինում զանգվածային անկարգություն կազմակերպելու մեղադրանքով էին մեղադրվում, երեկվանից գործը միացրել են: Դրանում փաստացի թափանցիկ կերպով «Սասնա ծռերին» օժանդակելու մեղադրանքի առաջադրման նախադրյալներ կան: Մեղադրանքների խստացումը պարզ է՝ նպատակ ունի համաներման սահմաններից դուրս դնել նրանց, դարձնել համաներման ոչ ենթակա: Այդ միտումը հստակ տեսանելի է, իսկ թե որոշների նկատմամբ ավելի մեղմ վերաբերմունք ցուցաբերելու և համաներման մեջ ներառելու ցանկություն չեմ կարող ասել, թե կա, բայց հակառակն առկա է»,- հավելեց Ա. Ենիգոմշյանը:
Լուսանկարը՝ Photolure-ի
