Միացյալ Նահանգների նորընտիր նախագահ Դոնալդ Թրամփը վերջին մեկուկես տարվա ընթացքում պարբերաբար հայտարարում էր, որ նախագահ ընտրվելուց հետո պատրաստվում է երկրից արտաքսել անօրինական միլիոնավոր ներգաղթյալների։ Վերջին նման հայտարարությունն արդեն ընտրվելուց հետո Թրամփն արել է CBS հեռուստաալիքին տված հարցազրույցում՝ ընդգծելով, որ մտադիր է «անհապաղ արտաքսել» քրեական անցյալ ունեցող միլիոնավոր ներգաղթյալների։
ԱՄՆ Կոնգրեսի ներկայացուցիչների պալատի խոսնակ Փոլ Ռայանը, սակայն, օրերս նշել է, որ Դոնալդ Թրամփը չի նախատեսում երկրում բնակվող անօրինական ներգաղթյալների համար ստեղծել զանգվածային արտաքսման մեխանիզմ։
«Մենք չենք նախատեսում ստեղծել արտաքսման մեխանիզմ։ Դոնալդ Թրամփը նման բան չի նախատեսում։ Կարծում եմ՝ պետք է հանգստացնենք մարդկանց։ Մենք կենտրոնացած չենք արտաքսման վրա։ Մենք կենտրոնացած ենք սահմանների անվտանգությունն ուժեղացնելու վրա»,- ասել է խոսնակը CNN հեռուստաալիքի եթերում։
«Կալիֆոռնիա Կուրիեր» թերթի հրատարակիչ և խմբագիր Հարութ Սասունյանը «Առաջին լրատվական»-ի հետ զրույցում ասաց, որ առայժմ Թրամփը խոսում է միայն մտադրությունների մասին։ Երբ վերջինս հունվարից ստանձնի նախագահի պաշտոնը, ավելի հստակ որոշում կկայացնի, թե կոնկրետ ում է նախատեսում արտաքսել:
«Ընտրությունների արդյունքը կարծես մեղմացրել է վերջինիս՝ մեկուկես տարվա ընթացքում արած հայտարարությունները։ Հիմա ասում է՝ 12 միլիոն ապօրինի մարդ կա Միացյալ Նահանգներում, որոնցից 2-3 միլիոնը հանցագործություններ են կատարել, և ըստ Թրամփի՝ առաջին հերթին նրանց պետք է արտաքսել»,- փոխանցեց Սասունյանը։
Կոնկրետ հայերի մասով մեր զրուցակիցը տեղեկություններ չուներ: Նա ասաց՝ չգիտի, թե որքան ապօրինի կեցություն ունեցող հայ կա Միացյալ Նահանգներում, բայց եթե նման օրենք մտնի ուժի մեջ՝ հավասար կլինի բոլորի համար։
ԱՄՆ նախագահական ընտրություններից առաջ հայկական լոբբիստական կազմակերպությունները չեզոքություն պահպանեցին՝ չսատարելով ո՛չ Թրամփին, ո՛չ էլ Քլինթոնին: «Քանի որ պարոն Թրամփը երբեք չի արտահայտվել հայկական հարցերից որևէ մեկի մասին, աշխարհում ոչ մեկը գաղափար չունի, թե ինչպես կզարգանան հայ-ամերիկյան հարաբերությունները։ Մեզ համար անծանոթ է իր անելիքն ու դիրքորոշումը հայկական հարցերի վերաբերյալ։ Ոչ ոքի չսատարելու դիրքորոշումը շատ ճիշտ էր»,- ընդգծեց Հարութ Սասունյանը։
Նա միևնույն ժամանակ նշեց, որ Թրամփի հետ հանդիպելու միայն ապարդյուն փորձեր են եղել: «Երկու թեկնածու կար, մեկը՝ Քլինթոնը, որի դիրքորոշումը լավ գիտեինք և հուսախաբ էինք իր դիրքորոշումից, երկրորդը պարոն Թրամփն էր՝ մի թեկնածու, որի մասին մենք ոչինչ չգիտեինք, իր հետ հանդիպելու մեր բոլոր փորձերը մնացին անպատասխան։ Անպատասխանատու կլիներ կողմ լինել նրան՝ մի մարդու, որը չգիտեինք, թե ինչպես է աշխատելու՝ ի վնաս մե՞զ, թե՞ ոչ»,- եզրափակեց մեր զրուցակիցը։
