Կանադայում ոստիկանությունը որոշել է սատկացնել չորս մետրանոց աֆրիկյան պիթոնին, որը Քեմփբելտոնում խեղդամահ էր արել երկու երեխաներին: Այդ մասին մամլո ասուլիսի ժամանակ հաղորդել է ոստիկանության սերժանտ Ալեն Թրեմբլեյը: Ինչպես նշում է The Toronto Star-ը՝ 45 կգ-անոց օձի մարմինը ուղարկվել է լաբորատորիա՝ հետազոտման:
Բարտներ եղբայրների ՝ 4-ամյա Նոյի և 6-ամյա Քոնորի մահվան գործով հետաքննությունը շարունակվում է: Հետաքննության տվյալներով՝ տղաները երեկոյան հյուր էին եկել իրենց ընկերոջը՝ կենդանաբանական խանութի տիրոջ որդուն: Խանութը գտնվում է է երկհարկանի տան առաջին հարկում:
Երեկոյան այնտեղ մնացած երեխաներին քնացրել են հյուրասենյակում: Պիթոնը գիշերը կարողացել է դուրս գալ իր ապակե ակվարիումից, օդափոխման համակարգով բարձրանալ վերևի հարկ, ներթափանցել երեխաների սենյակ և խեղդել Նոյին ու Քոնորին: Նրանց մարմինները առավոտյան հայտնաբերել է խանութի տերը՝ Ժան-Կլոդ Սավուն, ով էլ ոստիկանություն էր կանչել:
Օձերի մասնագետները ապշած են տեղի ունեցածից, քանի որ նրանց հավաստիացմամբ՝ պիթոնները մարդուն որպես սնունդ չեն դիտարկում: Նրանք չեն հարձակվում նրանց վրա, ում մտադիր չեն ուտել, իսկ այդ դեպքը հերթական զգուշացումն է այն բանի, որ չի կարելի տանը վտանգավոր կենդանիներ պահել, ինչպիսիք են՝ վագրերը, առյուծները, արջերը, պիթոնները:
