Sputnik լրատվական գործակալության փոխանցմամբ՝ Ռուսաստանի հետ հարաբերությունների կարգավորման հարցերով Վրաստանի վարչապետի հատուկ ներկայացուցիչ Զուրաբ Աբաշիձեն հայտարարել է, որ ռուսաստանցի զբոսաշրջիկները Վրաստանում գտնվելիս պետք է պահպանեն վրացական օրենսդրությունը։
Ավելի վաղ ՌԴ ԱԳՆ-ի զբոսաշրջային դաշնային գործակալությունը ռուսաստանցիներին զգուշացրել է Վրաստան այցելելու կապակցությամբ։ Ռոստուրիզմը ուշադրություն էր հրավիրել Վրաստանում գործող «Օկուպացված տարածքների մասին» օրենքին։
Գերատեսչությունն ընդգծել է, որ դիվանագիտական հարաբերությունների բացակայության պայմաններում բավական սահմանափակ են Վրաստանում ռուսաստանցիների հյուպատոսային ու իրավական պաշտպանության հնարավորությունները։
2016 թվականի առաջին 10 ամիսներին Վրաստան այցելել է ավելի քան 920.000 ռուսաստանցի այցելու, ինչը 13 տոկոսով գերազանցում է նախորդ տարվա հաշվետու ժամանակահատվածի ցուցանիշը։
