ՙՆոր ժամանակներ՚ կուսակցության նախագահ Արամ Կարապետյանն այսօր իշխանություն-Հայ ազգային կոնգրես երկխոսությունը որակեց որպես խուլի և համրի միջև երկխոսություն:
Նա մեկնաբանեց, որ նույն հարցի վերաբերյալ իշխանություններն ու ընդդիմությունը իրարամերժ կարծիքներ են հայտնում. խոսքն արտահերթ ընտրություններ անցկացնելու մասին է: «Իսկ եթե Հայ ազգային կոնգրես-իշխանություն երկխոսության արդյունքում իրապես լինելու են արտահերթ ընտրություններ, կազմաքանդվելու է ավազակապետությունը, ինչպես որ ասվել է, ապա ես դա ողջունում եմ»,- հայտարարեց նա:
Կարապետյանը կարծում է, որ այս երկխոսությունը թելադրված է միջազգային հանրության կողմից: «Մի տեղից է հրաման եկել, որ այլևս Հայ ազգային կոնգրեսն ու իշխանությունը չեն կռվում»,- նշեց նա և կարծիք հայտնեց, թե հիմա խոսվում է Կոնգրես-իշխանություն թիմով կրկին «Միասնություն» դաշինք ստեղծելու հնարավորության մասին: «Արտահերթ ընտրությունների հետ կապված մենք միջազգային ճնշում չենք տեսնում: Նրանք ցանկանում են այնպիսի մթնոլորտ ստեղծել, որ Հայաստանի իշխանությունները ԼՂ հարցում գնան որոշակի զիջումների, բացեն հայ-թուրքական սահմանը և ընդգրկվեն ՆԱՏՕ-ի հետ համընդգրկուն համագործակցության մեջ»,- նշեց պարոն Կարապետյանն ու հավելեց, թե իր ասածների մասին է վկայում Հայաստանում ԱՄՆ դեսպանի փոփոխությունը:
