Գերմանական Die Welt պարբերականը Բունդեսլիգայի 17 թիմերի ավագների շրջանում անցկացրել է հարցում, որի նպատակն էր իմանալ թիմերի ավագների կանխատեսումը՝ կապված Բունդեսլիգայի 2013/14թթ մրցաշրջանի չեմպիոնի, հայտնության (ակումբ), լավագույն ռմբարկուի և լավագույն արտասահմանցի ֆուտբոլիստի հետ:
17 ավագներից 15-ի կարծիքով Մյունխենի «Բավարիա»-ն պահպանելու է չեմպիոնի կոչումը:
Որպես հայտնություն առաջին տեղում է հայտնվել «Հոֆենհայմ»-ը՝ 4 ձայնով, իսկ որպես լավագույն ռմբարկու 11 ավագներ ընտրել են Ռոբերտ Լևանդովսկուն: 12 թիմերի ավագներ կարծում են, որ մրցաշրջանի լավագույն արտասահմանցի ֆուտբոլիստ է ճանաչվելու Մյունխենի «Բավարիա»-ի կիսապաշտպան Ֆրանկ Ռիբերին:
Հենրիխ Մխիթարյանը ստացել է 1 ձայն: Դորտմունդի «Բորուսիա»-ի ավագ Սեբաստիան Կելը նշել է, որ Հենրիխին Գերմանիայում ոչ բոլոր մարզասերներն են ճանաչում և մաղթել է լրացնել այդ բացը:
«Հենրիխ Մխիթարյանը Գերմանիայում դեռ այդքան էլ ճանաչված չէ: Մաղթում եմ, որ նա լրացնի այդ բացը»,- հայտարարել է Կելը, որպես լավագույն արտասահմանցի ֆուտբոլիստ Հենրիխի անունը նշելուց հետո:
