Եգիպտոսի ժամանակավոր կառավարությունը բանտարկությունը փոխարինել է տուգանքով՝ երկրի նախագահի պատիվն ու արժանապատվությունը վիրավորելու համար: Այս մասին հայտնում է Reuters գործակալությունը՝ հղում անելով հրամանագրին, որը երկուշաբթի ստորագրել է Եգիպտոսի ժամանակավոր ղեկավար Ադլի Մանսուրը:
Գործակալության տվյալներով՝ Եգիպտոսում նախկին նախագահ Մուհամմադ Մուրսիի կառավարման մեկ տարվա ընթացքում երկրի դատարանները քննել են նախագահին վիրավորելու 28 գործ, այսինքն՝ 4 գործով ավելի, քան երկրի դատավարության պատմության 115 տարիների ընթացքում:
Պետության ղեկավարի հասցեին վիրավորանքներ հնչեցնելու համար օրենքը նախատեսում էր մինչև 3 տարվա բանտարկություն: Մասնավորապես, հունիսի սկզբին սոցցանցերում Մուրսիին վիրավորելու համար 6 ամսվա ազատազրկման էր դատապարտվել բլոգեր Ահմեդ Դուման:
Համաձայն Մանսուրի ստորագրած փաստաթղթի՝ պետության ղեկավարին վիրավորելու համար նախատեսվող առավելագույն պատժաչափը կազմում է 30 հազար եգիպտական ֆունտ (4.3 հազար դոլար): Նոր փաստաթուղթը ջերմորեն է ընդունվել իրավապաշտպանների կողմից: Human Rights Watch-ը, սակայն, կարծում է, որ «նախագահին վիրավորելը» պետք է առհասարակ իրավախախտումների շարքից հանել:
