«Հրապարակ» օրաթերթի գլխավոր խմբագիր Արմինե Օհանյանն այսօրվա խմբագրականում գրում է.
«Տարիներ շարունակ հայ հանրությունը մի բան է պահանջում իշխանությունից. առանց ինձ տեղեկացնելու, առանց իմ կարծիքը հարցնելու որոշումներ մի կայացրու: Մանավանդ՝ դա նաև օրենքի պահանջն է:
Բազում օրենքների մեջ անգամ ամրագրված են հանրային քննարկումներ անելու, շահագրգիռ խմբերի կարծիքը հաշվի առնելու, ապա տվյալ որոշումը հրապարակայնացնելու նորմերը:
Բայց «սևին սապոնն ինչ անի»՝ իշխանությունն անխռով իր գործն առաջ է տանում, հաշվի չառնելով հանրային կարծիքը և հակահասարակական օրենքներ ընդունելով: Սակայն եթե տարիներ առաջ այդ պրակտիկան բավական անխափան գործում էր, հիմա, ինչպես ասում են, ավելի ու ավելի է ոտները քարին դեմ առնում: Օրինակները, ցավոք, այնքան էլ շատ չեն, բայց նախադեպային նշանակություն ունեն և դոմինոյի էֆեկտի վերածվելու հավակնություն:
Այս առումով տրանսպորտի թանկացման որոշումն ամենադիդակտիկն է: Ո՞րը կլինի հաջորդը՝ ապօրինի ավտոկայանատեղիների հա՞րցը, բուհական ուսվա՞րձը, կենսաթոշակներն ուշացնե՞լը, թե՞ այլ խնդիր՝ կերևա առաջիկայում:
Մի բան պարզ է, որ ՀՀ քաղաքացին այլևս նախկինը չէ. նա պատրաստ է պաշտպանել իր իրավունքները, և դրա համար նրան առանձնապես ուղղորդել, առաջնորդել, հուշել պետք էլ չէ…»:
Խմբագրականն ամբողջությամբ՝ կարդացեք «Հրապարակ»-ի այսօրվա համարում:
Լուսանկարը՝ PanARMENIAN Photo-ի
