Թուրքական Daily Sabah թերթի փոխանցմամբ՝ Թուրքիայի Գլխավոր դատախազությունը հայտնել է այս տարվա ամռանը երկրում իրականացված ռազմական հեղաշրջման փորձի կազմակերպման երկրորդ ենթադրյալ գլխավոր կասկածյալի անունը։
Իրավապահ մարմինների տվյալներով՝ խոսքը ոմն Քամալ Բաթմազի մասին է, որը հեղաշրջման մեկ այլ համակարգող Ադիլ Օքսյուզի հետ հեղաշրջման փորձից երկու օր առաջ է ԱՄՆ-ից վերադարձել Թուրքիա։
Ընդգծվում է, որ Բաթմազն ու Օքսյուզն ԱՄՆ-ում հանդիպել են ընդդիմադիր քարոզիչ Ֆեթհուլլահ Գյուլենի հետ։ Դատախազության հաղորդմամբ՝ ընդհանուր առմամբ այդ անձինք այս տարի ԱՄՆ այցելել են չորս անգամ։
Ադիլ Օքսյուզը ձերբակալվել է ռազմական հեղաշրջման փորձից անմիջապես հետո, սակայն հետագայում ազատ է արձակվել երկրից չբացակայելու ստորագրության դիմաց։
Դրանից հետո նա փախուստի է դիմել և ներկայումս գտնվում է հետախուզման մեջ։
