People պարբերականի փոխանցմամբ՝ 2014 թվականին մահացած դերասան Ռոբին Ուիլյամսին պատկանած 87 հեծանիվներից բաղկացած հավաքածուն Paddle 8 աճուրդի տանը վաճառվել է ավելի քան 600.000 դոլարով։
Բարեգործական աճուրդն անցկացվել է հոկտեմբերի 13-25-ին։ Դասական հեծանիվներից բացի, աճուրդի են հանվել նաև էլեկտրաինքնաշարժ, հեծանվասարք և ունիցիկլ (միանվանի տեղաշարժման միջոց)։
Հավաքածուի վաճառքից ստացված հասույթն ուղղվելու է բարեգործական երկու հիմնադրամի։ Դրանցից մեկը Christopher & Dana Reeve Foundation-ն է, որի հետ կյանքի ընթացքում ակտիվորեն համագործակցել է Ուիլյամսը։
Ռոբին Ուիլյամսը մոտ 100 դեր է կատարել կինոներում, աշխատել է stand up ժանրում, արժանացել «Օսկար» մրցանակի։ Նա ինքնասպանություն է գործել 2014 թվականի օգոստոսին։
Մահվանից քիչ առաջ նրա մոտ հայտնաբերվել է Պարկինսոնի հիվանդություն, սակայն ավելի ուշ բժիշկները սխալ են համարել ախտորոշումը և հայտարարել, որ դերասանն ըստ ամենայնի տառապել է այլ հիվանդությունից՝ DLB։
