NBC News-ի փոխանցմամբ՝ ԱՄՆ Հետաքննությունների դաշնային բյուրոն (FBI) որոշել է վերսկսել դեմոկրատներից ԱՄՆ նախագահի թեկնածու Հիլարի Քլինթոնի կողմից ԱՄՆ պետքարտուղարի պաշտոնում աշխատելիս մասնավոր փոստային սերվերի օգտագործման վերաբերյալ գործի հետաքննությունը։
Այդ մասին նշված է FBI-ի տնօրեն Ջեյմս Կոմի նամակում, որը հասցեագրված է ԱՄՆ սենատի օրենսդրական հանձնաժողովին։ Նա գրել է. «FBI-ն իմացել է էլեկտրոնային նամակների գոյության մասին, որոնք ինչպես երևում է՝ կապ ունեն հետաքննության հետ»։
Կոմին հավելել է, որ համաձայն է համապատասխան քննչական գործողություններ ձեռնարկելու անհրաժեշտության հետ, որպեսզի քննիչներին թույլատրվի ուսումնասիրել այդ նամակներն ու հստակեցնել, թե արդյոք դրանցում առկա է գաղտնի տեղեկատվություն։
Հոկտեմբերին Քլինթոնը ևս մեկ անգամ ներողություն է խնդրել պետքարտուղարի պաշտոնը զբաղեցնելու ժամանակ ծառայողական նպատակներով էլեկտրոնային փոստի անձնական սերվերն օգտագործելու համար։
Այն ժամանակ նա ընդգծել էր, որ շատ լրջորեն է վերաբերում գաղտնիացված տեղեկատվությանը և չկան ապացույցներ, որ ինչ-ինչ գաղտնի տվյալներ հայտնվել են օտարների ձեռքերում։
Նախնական տվյալներով՝ FBI-ը չի կարողացել ստանալ Քլինթոնի 33.000 էլեկտրոնային նամակներից օգտվելու թույլտվությունը, քանի որ դրանք ապօրինաբար վերացվել էին այն բանից հետո, ինչ նախկին պետքարտուղարը ստացել էր դատարան ներկայանալու ծանուցագիր՝ կապված էլեկտրոնային փոստի գործի հետ։
