ՏՏ ոլորտում համաշխարհային ներդրման համար 2016 թվականի Հայաստանի Հանրապետության Նախագահի մրցանակին արժանացավ համացանցի ստեղծողներից մեկը, Open-Root կազմակերպության գլխավոր տնօրեն Լուի Պուզանը: «Մենք յուրահատուկ ուշադրություն ենք դարձնում բարձր տեխնոլոգիական մշակումների, նորարարական գործունեության և գիտական-ինովացիոն հենքով տնտեսության զարգացման խնդիրներին և այս տեսանկյունից կարեւորում ենք պետական և մասնավոր հատվածների համագործակցությամբ իրականացվող ծրագրերը: Համոզված եմ, որ ՏՏ ոլորտում համաշխարհային ներդրման համար պարգեւը կբարձրացնի Հայաստանի վարկանիշը` որպես ՏՏ ոլորտը տնտեսության զարգացման գերակա ճյուղ հայտարարած երկրի»,- նշված է ՀՀ Նախագահ Սերժ Սարգսյանի շնորհավորական խոսքում՝ մեջբերված միջոցառման մամուլի հաղորդագրությունում:
Մրցանակաբաշխության կամկոմիտեի նախագահ Արմեն Գևորգյանը լրագրողների հետ հանդիպմանը նշեց, որ մրցանակաբաշխությունը դարձել է բարի եւ կարեւոր ավանդույթ, բոլոր մրցանակակիրներն էլ Հայաստանի բարի եւ լավ բարեկամները: «Կանցնեն տարիներ և այս պատվավոր մրցանակը ստանալու համար Հայաստան կժամանեն համաշխարհային ճանաչում ունեցող լեգենդներ, որոնք մեր երկրի վարկանիշը կբարձրացնեն, որպես գիտելիքին ապավինող երկիր»,-ասաց նա:
Մրցանակաբաշխության հանձնաժողովի անդամ Թոնի Մորոյանը ուրախությամբ նշեց, որ պահպանվել է ՏՏ ոլորտում համաշխարհային ներդրման համար ՀՀ Նախագահի պարգևի բարձր նշաձողը: «Այս մրցանակին ամեն տարի արժանանում են այնպիսի մարդիկ, ովքեր Նոբելյան մրցանակի իրական հավակնորդներ են»,-նշեց Մորոյանը:
