Օրերս «Ժամանակ» օրաթերթը գրել էր. «Հայտնի է դարձել, որ Վիկտոր Դալլաքյանի և պաշտպանության նախկին նախարարի գլխավորությամբ ստեղծվող «Երրորդ հանրապետություն» կուսակցությունը ստեղծվել է դեռ 2003թ. հոկտեմբերին։ Այն ժամանակ համապետական երկու՝ նախագահական և ԱԺ ընտրություններից հետո կուսակցությունը գրանցել է Խաչատուր Քոքոբելյանը։ Այժմ «Ազատ դեմոկրատների» նախագահը իրեն պատկանող և ոչ մեկին պետք չեկած կուսակցությունը վաճառել է Վիկտոր Դալլաքյանին՝ այսպիսով վերջինիս ազատելով գրանցման հետ կապված գլխացավանքից»:
Այդ առնչությամբ «Առաջին լրատվական»-ը փորձեց մեկնաբանություն ստանալ «Ազատ դեմոկրատներ» կուսակցությունից։ Կուսակցության մամուլի խոսնակ Անժելա Խաչատրյանը մեզ հետ զրույցում նշեց, որ այդ տեղեկությունն իրականության հետ որևէ աղերս չունի։
«Ո՛չ Խաչատուր Քոքոբելյանը և ո՛չ էլ «Ազատ դեմոկրատներ» կուսակցության անդամներից որևէ մեկը առնչություն չունի «Երրորդ Հանրապետություն» կուսակցության ո՛չ ստեղծման և ո՛չ էլ գործունեության հետ։ Եվ դա շատ հեշտ կարելի է պարզել. չէ՞ որ կուսակցությունները գրանցվում են արդարադատության նախարարությունում, և հիմնադիրներն ու վարչության կազմը հայտնի են»,- ասաց Անժելա Խաչատրյանը։
