ԱԺ պետաիրավական հարցերի մշտական հանձնաժողովը դրական եզրակացություն է տվել երկրորդ ընթերցմամբ ներկայացված ԸՕ նախագծի փոփոխություններին:
ԱԺ ՀՅԴ խմբակցության անդամ, պետաիրավական հարցերի մշտական հանձնաժողովի փոխնախագահ Արտյուշա Շահբազյանը մեզ հետ զրույցում ասաց, որ ինչ-ինչ փոփոխություններ նախագծում արվել են, որոշ հարցեր հստակեցվել են, սակայն դա ՀՅԴ-ին չի բավարարում:
«Ամենակարևոր հարցը կա` ինչպես անել, որ կրկնակի քվեարկություն չկատարվի, մեծաքանակ լցոնումներ չկատարվեն: Այս փոփոխություններով այդ խնդիրները չեն լուծվում»,- նշեց նա: Շահբազյանի կարծիքով, դրա համար կարևոր է ստորագրված ընտրացուցակների հրապարակումը:
Բացի այդ, Շահբազյանը կարևորեց ընտրական հանձնաժողովների ձևավորման կարգը: Նա առաջարկում է հանձնաժողովները կազմավորել 50/50 սկզբունքով` իշխանություն-ընդդիմություն համամասնությամբ: Հանձնաժողովների ձևավորման առումով Շահբազյանն առաջարկում է նաև երկրորդ տարբերակը` պետությունն ամբողջությամբ իր ձեռքը վերցնի ընտրական գործընթացի կազմակերպումը, մինչդեռ կոալիցիոն նախագծում միայն Կենտրոնական և ընտրատարածքային ընտրական հանձնաժողովներն են ձևավորվում պետության կողմից, իսկ տեղամասային ընտրական հանձնաժողովները կազմավորում են կուսակցությունները: «Այնտեղ, որտեղ հիմնական պատասխանատվության հարցն է, թողնվում է կուսակցությունների վրա: Այնինչ դա անհասկանալի է»,- նշեց նա:
