Ադրբեջանական APA լրատվական գործակալության փոխանցմամբ, պաշտպանական ոլորտում աշխատող թուրքական GATE Elektronik ընկերությունն Ադրբեջանին առաջարկել է իր նոր արտադրանքը: Այս մասին հայտարարել է ընկերության մենեջեր Օմեր Ֆարուք Շաթըրը:
Վերջինիս խոսքերով, իրենց ընկերությունն Ադրբեջանին առաջարկել է RobAs տիպի ունիվերսալ ռոբոտներ և անօդաչու ստորջրյա սարքեր: Այդ ռոբոտները կարող են գործածվել բազմաթիվ նպատակներով: Օրինակ` դրանք կարող են կատարել ականազերծման աշխատանքներ, ինչպես նաև իրենց վրա կրել սպառազինություն:
Նշվում է, որ թուրքական ընկերությունը 5 տարի շարունակ համագործակցում է ադրբեջանական կողմի հետ և Ադրբեջանին Թուրքիայի զինված ուժերի ցուցաբերած օգնության շրջանակներում տրամադրել է էլեկտրատեխնիկական վերանորոգման լաբորատորիա: Դրանում կարող են վերանորոգվել ադրբեջանական բանակի բոլոր էլեկտրոնային համակարգերը:
Հիշեցնենք, որ նախորդ տարի թուրքական ընկերություններն Ադրբեջանին հատկացրել են 267 միլիոն դոլարի պաշտպանական (ռազմական) արտադրանք:
Հրթիռների ու ռեակտիվ զինամթերքի արտադրության ոլորտում Թուրքիայում առաջատար ROKESTAN ընկերությունն Ադրբեջանին հատկացրել է 244 միլիոն դոլարի արտադրանք: Մնացած 23 միլիոն դոլարի արտադրանքը (Cobra զրահատրանսպորտ և Land Rover Defender ավտոմեքենաներ) մատակարարել է Otokar ընկերությունը:
