«Ազատություն» ռադիոկայանի փոխանցմամբ, այսօր Թբիլիսիում ու Բաթումում կայանալու են վրացական ընդդիմության լայնամասշտաբ բողոքի ակցիաներ:
Հակակառավարական ակցիաների գլխավոր նախաձեռնողը Վրաստանի խորհրդարանի նախկին խոսնակ Նինո Բուրջանաձեն է, ով հայտարարել է, որ բողոքի ակցիաները չեն դադարի այնքան ժամանակ, քանի դեռ նախագահ Սաակաշվիլին հրաժարական չի տվել:
Միևնույն ժամանակ, վրացական քաղաքական ուժերի մեծ մասն առավել չափավոր դիրքորոշում ունի և շեշտը դնում է ընտրական օրենսդրության բարելավման և ընտրությունների ճանապարհով իշխանափոխություն իրականացնելու վրա:
Հիշեցնենք, որ ավելի վաղ նշվում էր, որ Բուրջանաձեն 13 միլիոն դոլար է ստացել ռուսական հատուկ ծառայություններից` Վրաստանում իշխանափոխություն իրականացնելու համար:
Ի դեպ, երեկ էլ Վրաստանի պաշտպանության նախկին նախարար Իրակլի Օքրուաշվիլին Փարիզից վրացական բանակին կոչ է արել անցնել ընդդիմության կողմը` ընդգծելով, որ 2008 թվականին Ռուսաստանի դեմ պատերազմում պարտվելուց հետո նախագահ Սաակաշվիլին սկսել է ատել վրաց զինվորականներին: