«Վրաստանի ներքաղաքական իրավիճակը ընտրություններից առաջ» թեմայով լրագրողների հետ հանդիպմանը Վրաստանի հարցերով փորձագետ Ջոնի Մելիքյանը անդրադարձավ հարևան երկրի ներքաղաքական զարգացումներին՝ հիշեցնելով, որ հոկտեմբերի 27-ին Վրաստանում կանցկացվեն նախագահական ընտրություններ: Կենտրոնական ընտրական հանձնաժողովը ընդունել է 25 թեկնածուների փաստաթղթեր, բայց երկուսը մերժվել են, այսօրվա դրությամբ կա 23 թեկնածու:
Ջոնի Մելիքյանի պնդմամբ` թեկնածուներն այնքան էլ հայտնի չեն հասարակությանը: Հիմնական ֆավորիտներն են գործող իշխանությունների ներկայացուցիչ Գեորգի Մարգելաշվիլին`«Վրացական երազանք» կոալիցիայից, «Միացյալ ազգային շարժում» կուսակցության ներկայացուցիչ Բաքրաձեն, նաև՝ մի շարք այլ քաղաքական գործիչներ, այդ թվում՝ Նինո Բուրջանաձեն, Սալոմե Զուրաբիշվիլին:
«Այսօրվա դրությամբ Վրաստանում նկատվում է տնտեսական անկում: Երկու հիմնական ուժերը փորձում են այդ տվյալներն օգտագործել միմյանց դեմ: Նոր իշխանությունները փաստում են, որ այդ անկումը սկսվել է դեռեւս 2012թ.` նախկին իշխանությունների օրոք, իսկ ընդդիմությունը` «Միացյալ ազգային շարժումը», շեշտում է, որ նոր իշխանությունների գործունեության հետ է կապված այդ ամենը»,- ասաց Ջոնի Մելիքյանը:
Նա նշեց նաև, որ Ազգային դեմոկրատական ինստիտուտը տվյալներ էր հրապարակել Թբիլիսիում անցած ամսվա կեսերին, որով ցույց էր տրվում, որ Բիձինա Իվանիշվիլիի վարկանիշը վեց տոկոսով անկում է ապրել, բայց դեռևս այն կազմում է 69 տոկոս, իսկ Միխեիլ Սաակաշվիլիինը` 23:
«Դատարանը օրեր առաջ արդարացրեց ներքին գործերի նախկին նախարար, պաշտպանության նախարար Ախալայայի մեղքը մի քանի կետով: Սա ցույց է տալիս, որ դժվար է կայանում արդարադատության գործընթացը: Այս ամենը վկայում են այն մասին, որ Վրաստանում դեռևս առկա է երկիշխանություն, և այդ ամենը կշարունակվի մինչև նախագահական ընտրությունները»,- ասաց Ջոնի Մելիքյանը:
Լուսանկարը՝ Photolure-ի
