Վրացական GHN գործակալության փոխանցմամբ, Վրաստանի ՆԳՆ-ն մեկնաբանել է բանակին ուղղված պաշտպանության նախկին նախարար Իրակլի Օքրուաշվիլիի խռովության կոչը:
Վրաստանի ՆԳՆ-ի տեղեկատվական-վերլուծական դեպարտամենտի ղեկավար Շոթա Ուտիաշվիլին հայտարարել է, որ Վրաստան վերադառնալու պարագայում Օքրուաշվիլին կձերբակալվի.
«Օքրուաշվիլին ինքը պետք է կողմնորոշվի Վրաստան վերադառնալու հարցում: Հենց նա ոտք դնի վրացական սահման, մենք կձերբակալենք նրան: Իսկ եթե նա չգա Վրաստան, ապա ինքն իր համար սահման կծառայի: Նրա նկատմամբ իրավական հետապնդումը դադարեցված չէ»:
Հիշեցնենք, որ Օքրուաշվիլին Վրաստանի պաշտպանության նախարար է եղել 17.12.2004-10.11.2006-ն ընկած ժամանակահատվածում:
Վրաստանում Օքրուաշվիլիին մեղադրում են ռուսական հատուկ ծառայությունների գործակալ լինելու մեջ: Իսկ ապրիլի վերջին Վրաստանի «Ազգային ժողով» կուսակցության ներկայացուցիչ Էլիզբար Ջավելիձեն Օքրուաշվիլիին մեղադրեց հայկական արմատներ ունենալու մեջ` ընդգծելով, որ նրա հոր ազգանունը Ոսկանյան է:
