ԲՀԿ կուսակցության շարքերը լքած պատգամավոր Հայկ Խաչատրյանը նշել է, որ հնարավոր է համալրի «Համախմբում» կուսակցությունը: Այս առումով ԱԺ ԲՀԿ խմբակցության պատգամավոր «Համախմբում» կուսակցության անդամ Ստեփան Մարգարյանը «Առաջին լրատվական»-ի հետ զրույցում նշեց, որ պաշտոնական որևէ բան չկա. «Բայց եթե ուզում է գալ, ես ողջունում եմ, մենք շատ լավ հարաբերություններ ենք ունեցել, բավականին ակտիվ պատգամավոր է: Բնականաբար, եթե դիմի, ընթացակարգ է, պետք է քննարկվի այդ հարցը»:
Ի՞նչ ծրագրեր ունի «Համախմբում» կուսակցությունը 2017թ. ընտրություններում և չի՞ ուշացնում ակտիվ կուսակցական գործունեությունը: Այս հարցին ի պատասխան՝ Ս. Մարգարյանը նշեց. «Ծրագիրը հայտնի է՝ մասնակցել ընտրություններին և մաքսիմալ արդյունք ստանալ ընտրություններից, աշխատանքներ են ընթանում, շատ բաներ հրապարակային չեն: ՏԻՄ ընտրություններին, լինելով նորաստեղծ կուսակցություն, հապշտապ կերպով փորձեցինք մասնակցել, դա ևս նախապատրաստություն էր 2017-ին: Որպես մեկ ամսվա գրանցում ունեցող կուսակցություն՝ արդյունքները վատ չէին»:
Ս. Մարգարյանի խոսքով՝ ՏԻՄ ընտրությունները ցույց տվեցին, որ երբ որ ընդդիմադիր կուսակցություններն առանձին- առանձին են հանդես գալիս, խիստ անարդյունավետ է լինում: Նրա կարծիքով՝ եթե ընդդիմադիր կուսակցությունները միասնական գնային ընտրությունների, միանշանակ կհաղթեին: «Ես կարծում եմ՝ այս առումով ՏԻՄ ընտրություններից մենք դաս պիտի քաղենք: Եթե լինի համախմբում, ոչ իշխանական բևեռը հնարավորություն ունի ձևավորելու իշխանություն: Այս ՏԻՄ ընտրությունները համոզիչ դարձրեցին, որ հասարակությունը ավելի շատ ձայն տվեց ոչ իշխանական բևեռին, քան իշխանությանը: Դժվար էր երկրում մարդ գտնել, որ կասեր՝ ես գոհ եմ իշանություններից»:
Անդրադառնալով կառավարության ծրագրին՝ Ս. Մարգարյանը նշեց, որ ծրագրում մի քիչ անրոշություն կա, թե ինչ ժամանակահատվածի համար է նախատեսված. «Բացի դրանից՝ ծրագրում կան բազմաթիվ կարևոր դրույթներ, որոնց էֆեկտը չի երևալու: Այդ իմաստով դժվար է գնահատել: Ծրագրում ներառված են խնդիրներ, բայց դրանց լուծումներն ընդհանարակն են»:
Մանրամասները՝ տեսանյութում:
