Սիրիայի կառավարությունը պետք է համաձայնի Հալեպի գլխավերևում իր ավիացիայի թռիչքների դադարեցմանը։ Այս մասին հայտարարել է ՄԱԿ-ի գլխավոր քարտուղար Պան Գի Մունը մերձավորարևելյան երկրում տիրող իրավիճակի հարցով Գլխավոր ասամբլեայի ոչ պաշտոնական հանդիպման ժամանակ՝ փոխանցում է TASS գործակալությունը։
«Ռազմական գործողությունների դադարեցման ռեժիմը պետք է վերականգնվի ողջ Սիրիայով մեկ, իսկ կառավարությունը պետք է համաձայնի Հալեպի գլխավերևում ռազմաօդային ուժերի ինքնաթիռների թռիչքների դադարեցմանը»,-ընդգծել է Պան Գի Մունը։
Նա նաև կոչ է արել մեկուսացնել ծայրահեղականների կազմավորումները։ Նրա խոսքով՝ այդ հանձնարարությունների կատարումը պահանջում է վերահսկման արդյունավետ մեխանիզմների ներդրում։
ՄԱԿ-ի գլխավոր քարտուղարը ողջունել է Հալեպի ռմբակոծությունների՝ Ռուսաստանի կողմից միակողմանիորեն հայտարարված դադարեցումը։ Նրա կարծիքով՝ ավիահարվածներում դադարը թույլ կտա տարհանել հիվանդներին ու վիրավորներին սիրիական քաղաքից։
«ՄԱԿ-ի գործակալություններն ու մեր գործընկերները պատրաստվում են հրատապ տարհանում անցկացնել և առաջին բուժօգնություն ցուցաբերել հարյուրավոր հիվանդների ու ծանր վիրավորների Հալեպի արևելքում»,-նշել է Պան Գի Մունը։
