Սիրիայի Հալեպ քաղաքի Բուստան Ալ-Քասր շրջանում ահաբեկիչները ականանետներից և հրազենային զենքից այսօր կրակ են բացել մարդասիրական միջանցքի վրա։ Այն վայրում, որտեղով խաղաղ բնակիչները պետք է դուրս գային վերոնշյալ թաղամասից, պայթել է վեց ական։ Բացի այդ, ահաբեկիչները կրակ են բացել նաև հսկիչ-անցակետի ուղղությամբ։
«Առաջին լրատվական»-ի հետ զրույցում Հալեպի Հայ ավետարանական համայնքի համայնքապետ, վերապատվելի Հարություն Սելիմյանը նշեց, որ չնայած այս հանգամանքին՝ վերջին օրերին իրավիճակը համեմատաբար հանգիստ է: «Բայց Արևելյան Հալեպի բնակիչները, որոնք ոչ քրիստոնյա խավն են, իրենց զենքերը թողած՝ գալիս են միանում այն բաժնին, որը իշխանությունների վերահսկողության տակ է։ Այն սիրիացիները, որոնք ուզում են հանձնվել և այսպես ասած՝ վերադառնալ հայրենիքի գիրկը, հանդիպում են այդ մասի ընդդիմության պատնեշին։ Այդ պատճառով էլ այսօր Հալեպում բավականին մեծ զոհեր եղան»,- ասաց Սելիմյանը։
Նրա խոսքով՝ շատերն այսօր չեն ցանկանում մնալ ԴԱԻՇ-ի վերահսկողության տակ, ուզում են հանձնվել: «Զենքերն ուզում են թողնել, հանձնվել և միանալ իշխանություններին»,- ընդգծեց նա։
Ինչ վերաբերում է հայերին, մեր զրուցակցի փոխանցմամբ՝ իրավիճակը վերջին օրերին նույնն է. «Անցյալ շաբաթ բավականին լարված իրավիճակ էր, այսօր այդպես չէ, մի փոքր հանդարտ է։ Մարդիկ շատ ավելի բանիմաց մոտեցում ունեն այսօրվա իրականության հանդեպ։ Ես նշում եմ՝ հանգիստ են, բայց դա շատ հարաբերական է, ուղղակի հույս կա, որ պատերազմը կավարտվի, ու ամեն մարդ այս փոթորկի մեջ իր տեղը կգտնի»։
