Ադրբեջանական Turan լրատվական գործակալության փոխանցմամբ՝ Բաքվի ծանր հանցանքները քննող դատարանն այսօր հրապարակել է Ադրբեջանի Միջազգային բանկի (Ադրբեջանի խոշորագույն բանկ) նախկին ղեկավար Ջահանգիր Հաջիևի ու ևս 7 մարդու վերաբերյալ դատավճիռը:
Դատարանը Հաջիևին դատապարտել է 15 տարվա ազատազրկման: Հաջիևին մոտ կանգնած անձանցից Ազադ Ջավադովը դատապարտվել է 10 տարի և 11 ամիս ժամկետով ազատազրկման, Յուսիֆ Ալեկպերովը՝ 8.5 տարվա ազատազրկման, Իբրահիմ Հուսեյնովը՝ 8 տարի և 23 օր ժամկետով ազատազրկման:
Մամեդ Ջահանգիրովը, Քենան Օրուջևը, Անար Սուլթանովը և Իլգար Աբդուլալեան դատապարտվել են 3 տարվա ազատազրկման: Ազատազրկման դատապարտյալները մեղադրվել են խմբային եղանակով խոշոր չափի յուրացումների, ծանր հետևանքների հանգեցրած ծառայողական լիազորությունների չարաշահման, ծառայողական կեղծիքի, զենք-զինամթերք ապօրինի կրելու և պահելու համար:
Հաջիևը Ադրբեջանի Միջազգային բանկի ղեկավարի պաշտոնից հրաժարական էր տվել 2015 թվականի մարտի 18-ին՝ դա պատճառաբանելով «առողջական խնդիրներով»: Դրանից հետո կալանքի տակ էին վերցվել բանկի մի շարք նախկին բարձրաստիճան պաշտոնյաներ ու գործարարներ, որոնք խոշոր վարկեր էին ստացել բանկից:
Ոչ պաշտոնական տվյալներով՝ Ադրբեջանի Միջազգային բանկին չվերադարձված գումարը հասել է 6 միլիարդ դոլարի: Հաջիևը հարցաքննության էր կանչվել հոկտեմբերի 17-ին և կալանավորվել 2015 թվականի դեկտեմբերի 5-ին:
