Այսօր հրավիրված մամլո ասուլիսում Վիկտոր Դալլաքյանը հայտարարեց, որ հրաժարական է տալիս ՀՀ նախագահի աշխատակազմի ղեկավարի տեղակալի ու ԱԺ-ում նախագահի մշտական ներկայացուցչի պաշտոններից: Բացի դրանից՝ Դալլաքյանը նշեց, որ ինքը դուրս է գալիս ՀՀԿ-ից, հայտարարում է, որ այսուհետ վերադառնում է ակտիվ քաղաքականություն ու ակտիվորեն մասնակցելու է 2017 թ. Խորհրդարանական ընտրություններին:
«Հայտարարում եմ, որ եթե իմ հայտարարությունից հետո որևէ բան պատահի իմ կամ իմ ընտանիքի անդամների հետ, ապա դրա պատասխանատուն Սերժ Սարգսյանն է: Նաև դիմում եմ ՀՀ-ում հավատարմագրված դեսպաններին, որ նրանք հնարավորության դեպքում ուշադրություն դարձնեն իմ հայտարարություններին»,- հայտարարեց Դալլաքյանը:
Վիկտոր Դալլաքյանը նախ ներկայացրեց իր քաղաքական անցյալը, ասաց, որ օրենսդիր մարմնում 80-ից ավելի օրենսդրական փոփոխությունների հեղինակ է, համագործակցել է Հայաստանի բոլոր երեք նախագահների հետ՝ միաժամանակ քննադատելով նրանց:
Նա ներկայացրեց, թե ինչպես է եղել համագործակցությունը, թվարկեց նախագահներին արված առաջարկությունները, որոնք հետո կատարվել են, լուծում են ստացել, այնուհետև հայտարարեց. «Ես ՀՀ երեք նախագահների հետ համագործակցել եմ բացառապես իմ պատգամավորական գործունեության շրջանակներում ու երբեք նրանց որևէ անձնական հարցով չեմ դիմել»:
Վիկտոր Դալլաքյանը առաջիկայում պատրաստվում է կուսակցություն ստեղծել. «Թույլ տվեք փակագծերը չբացել, բայց այս ամսվա ընթացքում մանրամասներ կհաղորդեմ»:
Ինչ վերաբերում է մամուլում շրջանառվող տեղեկություններին, թե իր նոր ստեղծելիք կուսակցության անդամ է լինելու նաև Պաշտպանության նախկին նախարար Սեյրան Օհանյանը, Վիկտոր Դալլաքյանն արձագանքեց. «Սեյրան Օհանյանն իր գործունեության եւ ծրագրերի մասին որեւէ հրապարակային հայտարարություն չի կատարել, ուստի ես ձեռնպահ կմնամ որեւէ գնահատական տալ, երկրորդ՝ ես բարձր եմ գնահատում Սեյրան Օհանյանի գործունեությունը, եւ կարծում եմ, որ ցանկացած կուսակցության համար պատվաբեր կլինի, որպեսզի նման պետական, ռազմական պետական գործիչը համագործակցեր իրենց կուսակցության հետ:
Մանրամասները՝ տեսանյութում:
