Խաղաղ սիրիացիները հայտնվել են թակարդում այն բանից հետո, երբ իսլամիստները գրավել են Սիրիայի խոշորագույն Հալեպ քաղաքը: RT հեռուստաալիքի թղթակիցները եղել են այնտեղ և տեղեկացել, թե ինչպես են մարդիկ ապրում գրեթե չդադարող կրակի տակ:
Սիրիացի սպաներից մեկը լրագրողներին պատմել է, որ կան արահետներ, որոնցով կարելի է փախչել զինյալների կողմից վերահսկվող տարածքներից: Սակայն ահաբեկիչները կրակում են մարդկանց վրա, որոնք փորձում են լքել պաշարված վայրերը:
«Մեր կողմից քաղաքացիական անձանց համար բացվել է բազմաթիվ ճանապարհներ, որոնցով նրանք կարող են գալ մեզ մոտ, սակայն զինյալների դիպուկահարները կրակում են բոլորին, ում նկատում են: Նրանք քաղաքացիներին թույլ չեն տալիս լքել իրենց հատվածը»,- հայտնել է զինվորականը:
Սեպտեմբերին զինյալները փակեցին Հալեպի իրենց վերահսկողության տակ գտնվող տարածքներում մուտքը և ելքը, որի հետևանքով խաղաղ բնակիչները հայտնվել են գործնականորեն չընդհատվող գնդակոծությունների թակարդում:
«Մարդիկ ցանկանում են հեռանալ ահաբեկիչների կողմից վերահսկվող շրջաններից, սակայն չեն կարողանում: Նրանք չեն կարող լքել այդ շրջանները օրինական նորմալ ձևով: Նրանք (ահաբեկիչները) չեն ցանկանում նրանց բաց թողնել»,- պատմել է Հալեպի բնակիչներից մեկը՝ բժիշկ Նաբիլ Անտակին:
Վերջերս ապստամբները արևելյան Հալեպի բնակիչներին արգելել են այցելել իրենց հարազատներին կամ գնալ հիվանդանոց:
«Քաղաքում տեղաշարժվելը այժմ շատ դժվար է։ Մենք քայլում ենք փոքր արահետներով և փողոցներով, պատերի ճեղքերի միջով: Մենք չենք կարող փողոցներով քայլել: Մենք չենք կարող նույնիսկ երեխաներին թողնել դպրոց գնալ»,- հայտնել է քաղաքի բնակիչ Մուհամադ Հայակը:
