Ցորենի համաշխարհային գները մեկ շաբաթվա ընթացքում թանկացել են 17%-ով: Որպես ցորենի թանկացման պատճառ են նշվում ԱՄՆ-ի անձրևային եղանակներն ու Արևմտյան Եվրոպայի երաշտը:
Ցորենի ֆյուչերսները նախօրեին թանկացել են $0.53-ով կամ 7%-ով` կազմելով 8.17 $/բուշել, ինչը դոլարային արտահայտմամբ մեկ օրվա կտրվածքով ռեկորդային թանկացում է վերջին 7 ամսվա ընթացքում: Հիշեցենք, որ վերջին մեկ տարում ցորենը թանկացել է 91%-ով: Ցորենի բարձր գները պայմանավորված են նաև խաղորդների և սպեկուլյանտների «վախերով»: Ինչևէ, սա մեր օլիգարխիայի համար ցորենի և ալյուրի գները բարձրացնելու հերթական փայլուն առիթն է:
Զրուցեցինք տնտեսագետ Վահագն Խաչատրյանի հետ հասկանալու համար՝ սա արդյո՞ք պատշաճ առիթ է տեղական շուկայում գները թանկացնելու համար, թե՞ ոչ: Վահագն Խաչատրյանի խոսքերով, միանշանակորեն, սա տեղի օլիգարխների համար սպառողներից հավելյալ գումարներ աշխատելու հիանալի առիթ է: «Մերոնք սպասում են՝ թանկանա, որ իրենք էլ թանկացնեն: Տեսեք, մինչ այդ, մաքսային ծառայության ներկայացրած թղթերի համաձայն, Հայաստանը համաշխարհային գնից ցածր գնով ցորեն էր ներկրել: Մաքսային ծառայությունում, եթե չեմ սխալվում, 290 դոլարով էր 1 տոննան ներմուծված, երբ համաշխարհային շուկայում 320-350-ին մոտ էր: Բայց կարծում եմ, որ իրենք առիթից կօգտվեն և գները կբարձրացնեն՝ այդ հանգամանքը հաշվի չառնելով: Այսինքն՝ կապ չունի, որ Հայաստան համաշխարհային գներից ցածր գներով է ցորեն ներկրվում։ Նրանք կպատճառաբանեն, թե սպասելիքերը վատ են, և հացահատիկի գինը կբարձրանա»,- կանխատեսեց Վահագն Խաչատրյանը:
Հիշեցենք, որ Հայաստանում ալյուրի ներկրման շուկան մոնոպոլացված է, իսկ մենաշնորհը գտնվում է հայտնի գործարար, ԱԺ պատգամավոր Սամվել Ալեքսանյանի ձեռքում: Ստացվում է, որ ներկա պահին Սամվել Ալեքսանյանի մեծահոգությունից է կախված՝ Հայաստանում հայ սպառողի համար հացը կթանկանա՞, հայ մարդը կշարունակի՞ օգտվել հացից, թե՞ ոչ:
