Աշխարհի 170 երկրներից գրեթե 3 միլիոն մարդ է հավաքվել Երիտասարդության համաշխարհային օրվան նվիրված տոնակատարությունների վերջին օրը մատուցված պատարագին, որը տեղի է ունեցել Ռիո դե Ժանեյրոյի Կոպակոբանա լողափին։ Այս մասին տեղեկացնում են լատինամերիկյան հեռուստաալիքները:
Պատարագի ժամանակ, որին մասնակցել են Բրազիլիայի, Արգենտինայի և Բոլիվիայի նախագահները, Հռոմի պապը երիտասարդությանը քարոզչության կոչ է արել և աղոթել է վերջերս Իսպանիայում երկաթուղային վթարի ժամանակ զոհվածների հիշատակի համար:
Հռոմի պապը պատարագին ժամանել է իր համար նախատեսված բաց ավտոմեքենայով և ողջունել է լողափին հավաքված հարյուր հազարավոր ուխտավորներին, ովքեր գիշերն այնտեղ էին անցկացրել:
Պատարագից առաջ լողափին գտնվող բոլոր մարդիկ, այդ թվում նաև քահանաներն ու հոգևորակաները ի պատիվ պապի՝ մի քանի շարժումներից բաղկացած պար են կատարել: Այս պարի կազմակերպիչները հայտարարել են, որ ցանկանում են պարի մասնակիցների թվով ռեկորդ սահմանել:
Ինչևէ, տեղական ԶԼՄ-ներն արդեն նկատել են, որ պարը չի համապատասխանում ցանկացած ֆլեշ-մոբի համար պարտադիր որոշ կանոնների: Մասնավորապես, հավաքվածներն այն լողափին էին փորձել:
Ենթադրվում է, որ պատարագից հետո Ֆրանցիսկոս I-ը կհանդիպի Լատինամերիկյան եպիսկոպոսական կոնֆերանսի մասնակիցների հետ, որոնց առջև էլ հանդես կգա ելույթով: Դրանից հետո նա կժամանի Riocentr կոնֆերանս-սրահ, որտեղ կհանդիպի կամավորական շարժումների ներկայացուցիչների հետ: Երեկոյան հրաժեշտի խոսքից հետո Պապը կվերադառնա Հռոմ: