«Ես միշտ ասել եմ, որ գյումրեցու համար կարևորը անձը կամ աշխատանքը չէ, այլ կատարած աշխատանքը: Գյումրեցիները այս ՏԻՄ ընտրություններում ևս ճիշտ կողմնորոշվեցին»,- գնահատելով Գյումրիում երեկ տեղի ունեցած ՏԻՄ ընտրությունները՝ «Առաջին լրատվական»- ի հետ զրույցում ասաց ԲՀԿ խմբակցության պատգամավոր Մարտուն Գրիգորյանը: Նրա կարծիքով՝ այս ընտրություններում ընտրախախտումներ չեն արձանագրվել, միայն մանր-մունր տեխնիկական խնդիրներ են եղել, որոնք ընտրությունների արդյունքի վրա չեն ազդել:
Մ. Գրիգորյանի դիտարկմամբ՝ ընտրությունների արդյունքի վրա մեծ ազդեցություն է ունենում քարոզարշավի ընթացքը. «Ինչքան էլ աշխատես, մեկ է, քարոզարշավի ընթացքում պետք է ներկայացնես կատարած աշխատանքդ, 20 օրում մարդը վերհիշում է և ավելի լավ է կողմնորոշվում»:
Ըստ մամուլում շրջանառվող լուրերի՝ Մ. Գրիգորյանը Գյումրիում ՏԻՄ ընտրություններին աջակցում էր «Բալասանյան» դաշինքնին: Անդրադառնալով հարցին՝ ուղղորդեցի՞ք ձեր ընտրազանգվածին այս ընտրությունների ընթացքում, Մ. Գրիգորյանը պատասխանեց. «Իմ թաղամասում հաղթանակ է տարել գործող քաղաքապետը»:
Մարտուն Գրիգորյանի դիտարկմամբ՝ ավագանու ինստիտուտը անցածից լավն է լինելու, «Գործող քաղաքապետին իրական հակակշիռ կա, լուրջ խնդիրներ կարող է ունենալ քաղաքապետը եթե փորձի մեկ քայլ անգամ անել ոչ ի շահ գյումրեցիների և Գյումրի քաղաքի»:
Անդրադառնալով առաջիկա խորհրդարանական ընտրություններին մասնակցության վերաբերյալ հարցին՝ Մ. Գրիգորյանը նշեց. «Ես, որպես մեծամասնականով ընտրված պատգամավոր, պատրաստվում եմ առաջադրվել, թե որ կուսակցության ցուցակով, դեռ ժամանակ կա, կգա ժամանակը, այդ մասին կասեմ»:
Մանրամասները՝ տեսանյութում: