Ադրբեջանական Turan լրատվական գործակալության փոխանցմամբ՝ ԵԱՀԿ-ում ԱՄՆ մշտական ներկայացուցիչ, դեսպան Դանիել Բայերը լրատվամիջոցի հետ զրույցում հայտարարել է, որ եթե ադրբեջանական կողմը պատրաստակամություն հայտնի Բաքվում ԵԱՀԿ գործունեության վերականգնման վերաբերյալ, ապա ԱՄՆ-ը շատ ակտիվորեն կաջակցի դրան:
Բայերը միաժամանակ զարմանք է հայտնել Ադրբեջանի նախագահ Իլհամ Ալիևի քննադատական հայտարարությունների համար, որը որպես Բաքվում ԵԱՀԿ գրասենյակի գլխավոր մեղավոր նշել էր իր անունը:
«Այդ մեղադրանքներն անհիմն են: Ցավոք, ԵԱՀԿ Բաքվի գրասենյակի գործունեության դադարեցումը տեղի է ունեցել Ադրբեջանի կառավարության պահանջով: Դա կորուստ է թե՛ Ադրբեջանի կառավարության, թե՛ Ադրբեջանի ժողովրդի համար:
Մենք հավատում ենք, որ Ադրբեջանում ԵԱՀԿ առաքելությունը ներդրում կունենա Ադրբեջանի և տարածաշրջանի անվտանգության հարցում»,- ասել է նա:
Բայերը զավեշտալի է համարել այն պնդումները, թե ճնշում է գործադրել Ֆրանսիայի կառավարության վրա՝ հասնելու ԵԱՀԿ Բաքվի գրասենյակի ղեկավարի պաշտոնից Ալեքսիս Շախտախտինսկու պաշտոնանկությանը:
Բայերը տեղին չի համարել Ալիևի առաջ քաշած այն նախապայմանը, որ Բաքվում ԵԱՀԿ գրասենյակի բացման համար անհրաժեշտ է, որ Շախտախտինսկին վերադառնա դիվանագիտական ծառայության: «Ադրբեջանը պետք է ցուցաբերի ԵԱՀԿ-ի հետ համագործակցելու պատրաստակամություն:
Եթե ադրբեջանական կողմը հայտնի ԵԱՀԿ-ի գործունեությունը վերականգնելու պատրաստակամություն, ապա ԱՄՆ-ը շատ ակտիվորեն կողջունի դա»,- ասել է ԵԱՀԿ-ում ԱՄՆ մշտական ներկայացուցիչը:
