Թուրքական Sabah թերթի փոխանցմամբ՝ Թուրքիայի նախագահ Ռեջեփ Էրդողանը Դուբայի «Ռոտանա» հեռուստաալիքին տված հարցազրույցում, ի թիվս այլ հարցերի, անդրադարձել է նաև Եգիպտոսի հետ հարաբերությունների կարգավորման խնդրին:
Նրա խոսքով՝ Թուրքիայի ու Եգիպտոսի հարաբերությունների բարելավումը մեծապես կախված է բանտից նախկին նախագահ Մուհամմեդ Մուրսիին ու նրա կողմնակիցներին ազատ արձակելու մասին որոշումից. «Նրանց ազատ արձակելուց հետո հնարավոր է տրվի հարաբերությունների կարգավորման մեկնարկ: Երկու երկրների ժողովուրդների միջև առկա են սերտ կապեր: Եգիպտոսի հետ առևտրային կապերի զարգացումը դրական քայլ կլիներ Թուրքիայի համար:
Սակայն ես չեմ ընդունի իմ անձնական մասնակցությամբ եգիպտական կողմի հետ բանակցությունները: Դա ճիշտ չի լինի բարոյական տեսանկյունից:
Պատկերացրե՛ք, որ ժողովրդավարական երկրում պաշտպանության նախարարը տապալում է նախագահին: Դա անընդունելի է: Եգիպտոսի ներկայիս ղեկավարությունը իշխանության է եկել հեղաշրջման ճանապարհով: Այդ երկրում չկա ժողովրդավարական կառավարում: Ընդ որում՝ Մուրսին, որին ընտրությունների ժամանակ աջակցել է ընտրողների 52 տոկոսը, նստած է բանտում: Անհրաժեշտ է լուծել այդ խնդիրը»:
