Ասում է վրացի քաղաքագետ, ռազմավարական եւ միջազգային հետազոտությունների վրացական հիմնադրամի նախագահ Ալեքսանդր Ռոնդելին
– Պարոն Ռոնդելի, Վրաստանում արդեն երկրորդ աղմկահարույց միջադեպն է տեղի ունեցել, որտեղ շոշափվում են նաեւ ազգությամբ հայերի անուններ: Ըստ ձեզ, արդյո՞ք սա պատահականություն է, եւ արդյո՞ք այստեղ դուք քաղաքական ենթատեքստ տեսնում եք:
– Ինքս տեղյակ չեմ այդ գործերի մանրամասներին: Ես միայն մի բան եմ հասկանում, որ մեր երկու երկրների շահերից չի բխում, որպեսզի այդ ամենի շուրջ նման իրարանցում լիներ: Բայց երեւի այս անգամ ամեն ինչ այնքան լուրջ է եղել, որ աղմուկն էլ համարժեք էր: Ես, ամեն դեպքում, տեղյակ չեմ:
– Ըստ ձեզ, ինչպե՞ս այս պատմությունները կարող են ազդել Հայաստան-Վրաստան հարաբերությունների վրա:
– Չեմ կարծում, թե այս պատմությունները կարող են ազդել Հայաստան-Վրաստան հարաբերությունների վրա, որովհետեւ երկու կողմերն էլ շահեր ունեն, եւ այդ շահերն ավելի բարձր են, քան այս պատմությունները: Սրանք շատ մանր հարցեր են, որպեսզի կարողանան ազդել մեր հարաբերությունների վրա: Դրանք քրեական պատմություններ են եւ որեւէ առնչություն չունեն քաղաքականության հետ:
– Այսինքն` դուք պատահակա՞ն եք համարում, որ մեկ ամսվա մեջ Վրաստանից արդեն երկու սկանդալային պատմությունների մասին ենք լսում, որոնց մեջ ներգրավված են հայեր:
– Նման բաներ, իհարկե, ամեն տեղ էլ կարող են պատահել: Ես չեմ կարծում, թե այստեղ նման մանր հարցերը կարող էին ինչ-որ մեկին դրդել ինչ-որ քաղաքական հարցեր լուծելու: Մենք լավ հարաբերություններ ունենք, եւ կարծում եմ, որ այս պատմությունները ընդամենը քրեական պատմություններ են: Գուցե նաեւ թյուրիմացություն է: Բայց` ոչ քաղաքականություն: Այդ գործողությունները կատարել են անհատները, դրա հեղինակները պետությունները չեն կամ հայ հասարակությունը: Դրանք կոնկրետ մարդիկ են արել, եւ կոնկրետ մարդիկ էլ աշխատել են այս` վրացական կողմից: Այսինքն` դա որեւէ կապ չունի միջպետական հարաբերությունների եւ շահերի հետ: Ուստի ես կարծում եմ, որ պետք չէ այստեղ դավադրություն փնտրել, որ դա արվել է հատուկ հայերի դեմ կամ նման ենթատեքստով ու միտումով: Միանշանակ` ոչ: Մեզ մոտ գործակալներ են ձերբակալվել, եւ նրանց մեջ շատ են հենց վրացիները: Ի՞նչ պետք է անես: Բռնվել են- բռնվել են: Բայց մենք դա քաղաքականության հետ չենք կապում: Ինչ-որ մարդիկ ուղղակի ցանկացել են հարստանալ եւ գնացել են նման քայլի: Կամ` մեր կանանց բռնեցին Մալայզիայում, թմրանյութեր տեղափոխելու ժամանակ: Ժողովուրդը խոսում է այդ մասին եւ դատապարտում նրանց դրա համար: Ընդամենը այդքանը:
