«Անկախությունը չի նշանակում, որ բոլոր խնդիրները լուծվում են, անկախությունը նշանակում է, որ դու ես քո խնդիրները լուծում»,- անկախության ֆենոմենը այսպես է ընկալում գրող, հրապարակախոս Վահրամ Մարտիրոսյանը` շեշտելով, որ անկախությունն իր համար բացարձակ արժեք է: Հրապարակախոսն այս մեկնաբանությունը տվեց «Առաջին լրատվական»-ի հետ հարցազրույցում, որն արվել է Հայաստանի Անկախության 25-ամյակի կապակցությամբ:
Վահրամ Մարտիրոսյանի կարծիքով` այսօր մենք անկախության համար պատերազմի մեջ ենք, և ճիշտ դաշնակիցների ընտրությունը կլինի Հայաստանի ապագան: «Շատ ժողովուրդներ չէ, որ ունեն անկախության տոն, մի մասն այն պատճառով, որ մինչև հիմա պետություն չունեն, մի մասն էլ այն պատճառով, որ իրենց պետականությունը եղել է տևական ժամանակ, չի ընդհատվել: Բայց մեզ համար սա կարևորագույն տոն է, երկար դարեր զրկված ենք եղել Աստծո այդ պարգևից: Այն, որ մենք տոնում ենք անկախության օրը, ինքնին նշանակում է, որ մենք անկախացել ենք ինչ-որ բանից. դա Խորհրդային Միությունն է: Անկախության առաջին շրջանը, իր բոլոր փորձություններով հանդերձ, մեզ համար սկսվեց բավականին բարվոք՝ Ռուսաստանի հետ հարաբերությունների առումով»,- Վահրամ Մարտիրոսյանը:
Ըստ նրա` եթե այսօր մեր երկիրը խնդիրներ ունի, դա նշանակում է, որ երկրի ներսում մենք խնդիրները չենք լուծել: Անկախ պետության համար, փոքր, թե մեծ, կան ծանր ժամանակներ:
Պատասխանելով հարցին, որ գուցե մեր խնդիրները մեր ինքնիշխանության անկման պատճառով են առաջացել, Վ. Մարտիրոսյանը պատասխանեց` այդ խնդիրները և՛ մեր իշխանության վարքի, պահվածքի, և՛ ժողովրդի կողմից անկախության արժեքը բավարար չգնահատելու հետևանք են:
Ինչ վերբերում է Եվրասիական միությանը Հայաստանի անդամակցությանը, Վահրամ Մարտիրոսյանը նշեց, որ մենք եթե նույնիսկ անվտանգության կամ տնտեսական շահերի համար որևէ դաշինքի մեջ պիտի լինենք, պետք է ազգովին գիտակցենք, թե քաղքակրթական իմաստով ո՞ր դաշինքն է մեզ համապատասխան:
«Մենք ազգովի պիտի գիտակցենք, թե որտե՞ղ ենք մենք գտնվում քաղաքակրթական իմաստով, ո՞ր դաշինքն է մերը քաղաքակրթական իմաստով: Այստեղ ես նորից պիտի հղում անեմ պատմությանը: Քրիստոնեության ընդունումից ի վեր մենք հարկադրված ենք եղել այդ ընտրությունը անելու: Եթե մենք նայում ենք մեր արմատներին, ինչի՞ մասին է մեր ազգային էպոսը` «Սասնա ծռերը». անկախության պայքարի մասին է: Կար մի Դավիթ, որից թաքցնում էին խաչ-պատերազմին, Քուռկիկ Ջալալին, թուր-կեծակին, որպեսզի հլու-հնազանդ հարկ տար արաբներին: Արաբները չեն լինի` պարսիկները կլինեն, պարսիկները չեն լինի` թուրքերը կգան, նրանց հարկ կտանք, բայց դա գոյության ձև չէ, դա արժանապատվության հետ որևէ կապ չունի: Եթե գաղութացված ես, կա պատերազմի խաչը, կա թուր-կեծակին, պիտի դուրս գաս և նվաճես քո անկախությունը»:
Մանրամասները` տեսանյութում:
