Միջազգային հանրությանը հաջողվել է 2016 թվականին փախստականների օգնության ծրագրերի համար հավաքել մոտ 4.5 մլրդ դոլար։ Նման տվյալներ են պարունակվում «Փախստականների հարցով առաջնորդների գագաթնաժողովի» մասնակիցների հրապարակած հայտարարությունում։ Հանդիպմանը մասնակցել են ԱՄՆ-ը, Գերմանիան, Կանադան, Շվեդիան, Մեքսիկան, Հորդանանը և Եթովպիան։ Գագաթնաժողովն ընթացել է Նյու Յորքում՝ ՄԱԿ-ի գլխավոր ասամբլեայի 71-րդ նստաշրջանի ընթացքում՝ փոխանցում է RIA Novosti-ն։
«Մենք ձգտել ենք հավաքել 3 մլրդ դոլար՝ մարդասիրական գործունեության գլոբալ ֆինանսավորման շրջանակում։ Շնորհիվ մեր ընդհանուր ջանքերի՝ 2016-ի ընթացքում 32 դոնոր երկրներ հատկացրել են մոտ 4.5 մլրդ դոլար՝ ի պատասխան ՄԱԿ-ի և միջազգային հումանիտար կազմակերպությունների կոչերի, որոնք հնչեցվել են 2015 թվականին»,- ասվում է հայտարարության մեջ։
Բացի դրանից՝ մարդասիրական ջանքերի շրջանակում կհաջողվի հասնել նրան, որ մոտ 1 մլն փախստական երեխաներ կկարողանան հաճախել դպրոցներ այն երկրներում, որտեղ ապաստանել են։
