Ինչպես արդեն հայտնի է, Գյումրիում թեկնածուներ առաջադրած կուսակցությունները հայտնել են իրենց քարոզարշավը ժամանակավորապես դադարեցնելու մասին՝ կապված քաղաքում տեղի ունեցած հայտնի ողբերգական միջադեպի հետ:
«Քաղաքացիական պայմանագիր» կուսակցության ավագանու ցուցակը գլխավորող՝ քաղաքապետի թեկնածու Արթուր Համբարձումյանը «Բարգավաճ Հայաստան» կուսակցությունից Գյումրիի քաղաքապետի թեկնածու Վարդևան Գրիգորյանի որդու մահվան առնչությամբ առայժմ զերծ մնաց գնահատականներից, թե՝ որքանով է այս դեպքը կապված նախընտրական գործողությունների հետ. «Տարվում է նախաքննություն, որից հետո կուսակցությունը հանդես կգա հայտարարությամբ»:
Բնութագրելով Գյումրիում ընդհանուր մթնոլորտը ընտրություններից առաջ՝ Արթուր Համբարձումյանը նշեց. «Քարոզարշավը ընթացել է շատ կոկիկ, մինչ այս պահը ինչ-որ արտառոց երևույթներ տեղի չեն ունեցել: Իհարկե՝ եղել է որոշակի լարվածություն, ինչը նորմալ է»:
«Ես և «Քաղաքացիական պայմանագիրը» ամեն գնով իշխանության ձգտող ուժ չենք: Մենք կարծում ենք՝ իշխանության պետք է ձգտել ծրագրերն իրականացնելու համար, և այդ պայքարը պետք է լինի քաղաքական և քաղաքակիրթ»,- ասաց նա:
Մեր զրուցակիցը այս դեպքի հետ կապված հորդորեց չշտապել և տուրք չտալ կենցաղային մակարդակի խոսակցություններին՝ ասելով. «Զառերի պատմությունը սև PR-ի շարունակությունն էր»:
