ՄԱԿ-ում ԱՄՆ մշտական ներկայացուցիչ Սամանտա Փաուերը Սիրիայի հարցով ԱԽ հանդիպմանը հրաժարվել է լսել ռուսական պատվիրակության ելույթը՝ դրա փոխարեն լրագրողների ներկայությամբ սկսելով քննադատել Ռուսաստանին: Այս մասին հայտարարել է ՄԱԿ-ում ՌԴ մշտական ներկայացուցիչ Վիտալի Չուրկինը՝ գրում է RIA Novosti-ն:
«Երբ հավաքվել էինք խորհրդակցության, ես սկսեցի կիսել իմ մտահոգությունները Խորհրդի անդամների հետ, ինչպես պարզվեց՝ նա դուրս էր եկել մամուլի ներկայացուցիչների մոտ և առանց ինձ լսելու՝ սկսել քննադատել և ամեն ինչում մեղադրել Ռուսաստանին, նույնիսկ այն բանի համար, որ մենք հրավիրել ենք այս նիստը»,- ասել է Չուրկինը:
ԱՄՆ մշտական ներկայացուցիչը Չուրկինի ելույթից հետո է միայն դահլիճ մտել և, ըստ Չուրկինի, հայտարարել, որ «իրեն հետաքրքիր չէ, թե ես ինչ եմ ասում, որ այդ ամենը էժանագին հնարք է և այլն»: Փաուերը նաև լրագրողների ներկայությամբ հայտարարել է, որ Ռուսաստանի այս նախաձեռնությունը «ցինիկ և երասպաշտական հնարք է»:
Ռուսաստանի ներկայացուցիչը նշել է նաև, որ, ի պատասխան՝ ինքը ևս հրաժարվել է լսել Փաուերին: «Միանգամայն աննախադեպ ցուցադրական պահվածք: Այդ պայմաններում ինձ ևս դադարեց հետաքրքրել նրա ելույթը և այն, թե նա ինչպես պետք է մեզ մեղադրի բոլոր մահացու մեղքերում, և ես նույնպես հեռացա, այնտեղ մնաց մեր պատվիրակությունը»,- ասել է Չուրկինը:
