Ադրբեջանական Turan լրատվական գործակալության փոխանցմամբ՝ նախօրեին ԱՄՆ Կոնգրեսում լայն քննարկումներ են տեղի ունեցել Ադրբեջանում մարդու իրավունքների խախտումների շուրջ։
«Ադրբեջան. արդյոք նշանակություն ունե՞ն մարդու իրավունքները» լսումները կազմակերպվել են Կոնգրեսի այն հանձնաժողովի կողմից, որը հետևում է համայն աշխարհում մարդու իրավունքների նորմերին։
Երկկուսակցական հանձնաժողովի համանախագահ Թոմ Լանթոսը հույս է հայտնել, որ ԱՄՆ հաջորդ վարչակարգը կոշտ դիրքորոշում կզբաղեցնի Ադրբեջանի հանդեպ, ուր մշտապես վատթարանում է մարդու իրավունքների շուրջ իրավիճակը։
Կոնգրեսական Ջիմ Մաքգովերնը, ով «Մագնիտսկու գլոբալ ցուցակի» ու «Ժողովրդավարությունն Ադրբեջանում» ակտերի համահեղինակ է, խորը մտահոգություն է հայտնել Ադրբեջանում առանցքային հանրաքվեից առաջ լրագրողների ու քաղաքացիական հասարակության ակտիվիստների դեմ վերջին բռնությունների համար։
Ընդգծվել է, որ այդ հանրաքվեն միտված է Ադրբեջանի նախագահ Իլհամ Ալիևի իշխանությունն ամրապնդելուն։ Մաքգովերնը հույս է հայտնել, որ Մագնիտսկու գլոբալ ցուցակի մասին օրենքը իր ուղին Կոնգրեսով կանցնի մինչև տարեվերջ.
«Սակայն եթե դա տեղի չունենա, ապա մենք պատրաստվում ենք դիմել վարչակարգին, որպեսզի նա լինի ավելի վճռական և անի այն, ինչի իրավունքն արդեն ունի՝ պատժամիջոցներ սահմանի այն անձանց դեմ, որոնք մեղավոր են մարդու իրավունքների խախտումների ու կոռուպցիայի համար»։
Լսումներին մասնակցել են նաև Ադրբեջանի ներկայացուցիչները։ Ընդդիմադիր Ժողովրդական ճակատ կուսակցության առաջնորդ Ալի Քերիմլիի որդին՝ Թյուրքել Քերիմլին, հայտարարել է, որ Ադրբեջանի կառավարությունը հրաժարվել է թարմացնել իր հոր անձնագիրը և վերջին տասնամյակում նա ապրում է երկրից դուրս չգալու արգելքի տակ։
Թյուրքել Քերիմլին հայտարարել է, որ Ադրբեջանում գոյություն ունի ավելի քան 100 քաղբանտարկյալ, իսկ քաղաքական շատ այլ կուսակցությունների անդամներ հետապնդվում են։
Հետաքննող լրագրող Խադիջա Իսմայիլովան իր հերթին հայտարարել է, որ Ադրբեջանում կա 138 քաղբանտարկյալ, և որ Ադրբեջանը բառի բուն իմաստով վերածվել է բանտի։
Ադրբեջանում ԱՄՆ նախկին դեսպան Ռիչարդ Կոզլարիչը հանձնաժողովին հայտնել է, որ ԱՄՆ-ը պետք է հրաժարվի «խաղաղ դիվանագիտությունից», քանի որ դա չի աշխատում և ավելի ակտիվ դիմակայի Ալիևի կառավարությանը. «Խաղաղ դիվանագիտությունը քաղբանտարկյալներին վերածել է սակարկության օբյեկտի»։
