63-ամյա մի տղամարդ ներկայացել է ոստիկանություն և հայտարարել, որ ինքը խողովակով խփել է իր դստեր ընկերոջ գլխին, երբ վերջինս քնած է եղել: Գլենդելում բնակվող կնոջ հայրը` Լևոն Հովհաննիսյանը, ձերբակալվել է սպանության փորձի և մարմնական ծանր վնասվածքներ հասցնելու մեղադրանքով: Այս մասին հաղորդում է The Glendale News Press-ը:
«Ամեն օր չէ, որ ինչ-որ մեկը այսպիսի լուրջ հարձակում կատարած լինի և փորձի սպանել մեկ ուրիշին»,- նշել է Լոս Անջելեսի ոստիկանության ներկայացուցիչը: Սակայն շրջանային դատախազությունը նրա նկատմամբ գործ չի հարուցել: Պարզվել է, որ հարվածը հասցնելուց հետո նրա դստեր ընկերոջը` 33-ամյա Մաուրիսիո Բուենդային տեղափոխել են Գլենդելի Մեմորիալ հիվանդանոց, որտեղից նրան նույն օրը դուրս են գրել:
Իսկ Հովհաննիսյանը ներկայացել էր ոստիկանություն ձեռքերը վեր պարզած` ասելով, թե հանձնվում է, քանի որ մարդ է սպանել: Հարվածը հասցնելուց հետո նրան թվացել էր, թե աղջկա «փեսացուն» մահացել է:
Հայտնի է, որ Հովհաննիսյանը դստեր հետ է ապրում այս տարվա հունվարից, երբ Հայաստանից տեղափոխվել է ԱՄՆ: Սպանության փորձի նախորդ գիշերը նրա դուստրն ու ընկերը շատ երկար լեզվակռիվ են ունեցել: