Ռուսաստանի և ԱՄՆ-ի հարաբերությունների անհաջող վերբեռնումը, որը ձեռնարկվել էր այն ժամանակ, երբ ԱՄՆ պետքարտուղարի պաշտոնը զբաղեցնում էր Հիլարի Քլինթոնը, հանգեցրեց Ուկրաինայում ճգնաժամի: Այսպիսի պնդմամբ է հանդես եկել ԱՄՆ նախագահի հանրապետական թեկնածու Դոնալդ Թրամփի նախընտրական շտաբը:
Թրամփի շտաբն այս հայտարարությունը տարածել է, երբ հայտնի է դարձել, որ Դեմոկրատական կուսակցությունից ԱՄՆ նախագահի թեկնածու Քլինթոնը մտադիր է Նյու Յորքում ՄԱԿ ԳԱ 71-րդ նստաշրջանի շրջանակներում հանդիպել, մասնավորապես, Ուկրաինայի նախագահ Պյոտր Պորոշենկոյի, նաև Եգիպտոսի նախագահ Աբդել Ֆաթահ Աս-Սիսիի հետ:
«Քլինթոնի (սպասվող) հանդիպումները Եգիպտոսի և Ուկրաինայի ղեկավարների հետ կծառայեն որպես լուրջ հիշեցում առ այն, թե ինչ անհաջող ղեկավար է նա եղել որպես ամերիկյան դիվանագիտության ղեկավար»,- ասվում է հաղորդագրության մեջ: Դրանում նաև ասվում է, որ Ուկրաինայում ճգնաժամի է հանգեցրել «Ռուսաստանի հետ (հարաբերությունների) Քլինթոնի ձախողված վերբեռնումը»:
Ինչ վերաբերում է Եգիպտոսին, Քլինթոնի՝ ԱՄՆ պետքարտուղար եղած ժամանակ «Եգիպտոսի արևմտամետ կառավարությունը փոխարինվեց «Մուսուլման եղբայրներով»»՝ նշվում է միլիարդատիրոջ շտաբի հաղորդագրության մեջ:
«Մեզ պետք է ուժեղ նոր ղեկավար համաշխարհային հարթակում, ինչպիսին Դոնալդ Թրամփն է, ոչ թե նա, ով նորից կիրականացնի առաջատարության քաղաքականություն այլոց մեջքի հետևից, ինչպես եղել է վերջին 8 տարիներին»,- հայտարարել են Թրամփի շտաբում:
