Բաքվի խանութներում հայտնաբերվել են մթերքներ՝ զինվորների համար նախատեսված սննդի փաթեթներից: Այս մասին հայտնում է Virtualaz.org-ը:
Որպես ապացույց՝ կայքը հրապարակել է ջեմի տարայի փաթեթավորման լուսանկարը, որը գնել են մայրաքաղաքի խանութներից մեկից: Փաթեթի վրա նշված է, որ մթերքը վաճառքի ենթակա չէ, նախատեսված է զինվորականների համար:
Ադրբեջանի մայրաքաղաքի բնակչի խոսքով՝ ջեմի 20 գրամանոց տարան իրեն վաճառել են 20 կոպեկով:
Աղբյուրը հավաստում է, որ զինվորականների համար նախատեսված մթերքներից վաճառքի են հանվում նաև բրինձ, ոսպ, հնդկացորեն, կաթի փոշի, ձուկ և այլ մթերքներ: Թարմ սառեցված ձկան մեկ կիլոգրամն արժե 2-2.5 մանաթ (մեկ մանաթը մոտավորապես համարժեք է մեկ եվրոյի):
Ենթադրաբար, սննդի փաթեթները ստացվում են զինվորական ուսումնական հաստատություններից: Շաբաթ-կիրակի օրերին զինվորների մեծ մասը տուն են գնում, այդ իսկ պատճառով նրանց սնունդը մնում է:
Ադրբեջանի ՊՆ մամլո ծառայությունում հայտնել են, որ այդ տեղեկությունը ստուգման կարիք ունի: