Միացյալ Նահանգների Սենատի արտաքին հարաբերությունների հանձնաժողովում քննարկվել է Սամանտա Փաուերի թեկնածությունը՝ ՄԱԿ-ում ԱՄՆ-ի դեսպանի պաշտոնում հաստատելու վերաբերյալ:
«Երկիր Մեդիա»-ին Ամերիկայի Հայ դատի գրասենյակից փոխանցել են, որ հանձնաժողովի նախագահ, հայամետ սենատոր Ռոբերտ Մենենդեսը հարցերի միջոցով փորձել է պարզել Փաուերի դիրքորոշումը ցեղասպանությունների և հատկապես՝ Հայոց ցեղասպանության հարցում: Լսումների ժամանակ Փաուերը նշել է, որ ցեղասպանությունների ճանաչման դեպքում պետք է հիմնվել միայն փաստերի վրա, եթե փաստերն ակնհայտ են, ապա պետք է ճանաչել այն՝ անկախ նրանից, թե որ երկրում է կատարվել:
Մենենդեսը բարձր է գնահատել նրա ցուցաբերած սկզբունքային դիրքորոշումը Հայոց ցեղասպանության վերաբերյալ և հայտարարել, որ կիսում է 2007թ. Time-ում Փաուերի արտահայտած այն միտքը, որ 21-րդ դարում հնարավոր չէ կայուն և արդյունավետ հարաբերություններ ստեղծել Թուրքիայի հետ՝ հիմնվելով ստի վրա:
Սամանտա Փաուերը մեծ ճանաչում է ստացել իր «Հիմնախնդիր դժոխքից. Ամերիկան և ցեղասպանության դարը» գրքի շնորհիվ: Դրանում արծածվել է նաև Հայոց Ցեղասպանության հարցը:
«Հայաստանում, նացիստական Գերմանիայում, Կամբոջայում և Ռուանդայում ցեղասպանությունները տեղի են ունեցել այն պատճառով, որ կառավարություններն աչք են փակել դրանց վրա, իսկ առանձին անհատներ ընտրել են չմիջամտելու քաղաքականությունը»,- գրել է նա:
