Հայազգի վարորդ Հրաչյա Հարությունյանի վերաբերյալ «Ռոսիա-1»-ով «Վեստի նեդելիի» հատուկ թղթակից Օլգա Սկաբաևան խիստ ցածր պրոֆեսիոնալիզմի ռեպորտաժ էր պատրաստել` ինքնուրույն դատավճիռ հրապարակել, ապա իրեն իրավունք վերապահել խոսել ածականներով և վիրավորական արտահայտություններով:
Այս կապակցությամբ մեկնաբանություններ են հնչում, թե անհրաժեշտ է Հայաստանում դադարեցնել այդօրինակ ալիքների հեռարձակումը, որպեսզի ռուսական հիստերիան իր պրոպագանդան չանի այստեղ:
«Առաջին լրատվական»-ի հետ զրույցում «Ազատություն» ռադիոկայանի հայկական ծառայության ղեկավար Հրայր Թամրազյանն, անդրադառնալով ռուս լրագրողուհու ռեպորտաժին և պատասխանելով մեր այն հարցին, թե նման բան հնարավո՞ր է հեռարձակվեր Արևմուտքում, օրինակ՝ ամերիկյան որևէ լրատվամիջոցում, ասաց. «Ածականներով ռեպորտաժ Արևմուտքում հնարավոր չէ հեռարձակվեր, որովհետև անմիջապես կարող է տուժող կողմը` տվյալ դեպքում Հրաչյան, դատարանում գործ հարուցեր այն լրատվամիջոցի նկատմամբ, որը վիրավորել կամ ինչ-որ կերպ նվաստացրել է իր արժանապատվությունը: Ուղղակի այնտեղ խտրականությունը` էթնիկական, ռասայական հողի վրա շատ լուրջ պատժվող հանցանք է, և հատկապես այդ հարցերում ամերիկյան օրենքը խիստ պատժում է»:
Հրայր Թամրազյանի կարծիքով՝ կարող է ոչ թե լրագրողի այլ լրատվամիջոցի դեմ դատական գործ հարուցվել, հետևաբար նրանք թույլ չեն տա, որպեսզի նմանատիպ ռեպորտաժ եթեր հեռարձակվի կամ հրապարկվի. «Տվյալ դեպքում թերթի կամ լրատվամիջոցի (ոչ լրագրողի) դեմ կարող են գործողություններ ուղղվել և միլիոննեի փոխհատուցում պահանջել, այնպես որ ես չեմ հավատում, որ նման բան կարող է այնտեղ լինել»:
Մեր այն հարցին, թե ճի՞շտ կլինի, որ Հայաստանում դադարեցվի այդ հեռուստաալիքի հեռարձակումը, Հ. Թամրազյանը պատասխանեց. «Ես կարծում եմ՝ սխալ է, նման բաներ անել չի կարելի, որևէ լրատվամիջոցի փակվելը լավ չէ ազատ մամուլի համար: Ես, որպես լրատվամիջոցի ղեկավար, համաձայն չէի լինի այդ որոշման հետ, որովհետև եթե լրատվամիջոցը սխալ է արել, երբ նման բան է հաղորդել, ապա կարելի է բողոք ուղարկել, և ընդհանրապես` պարզապես կարելի է չնայել»:
Մեր զրուցակցի կարծիքով` դա ցածր լրագրողական պրոֆեսիոնալիզմի կամ պրոֆեսիոնալիզմի բացակայության արդյունք է, որը ըստ նրա` հետխորհրդային շրջանի երկրներին բնորոշ թերություն է. «Հետխորհրդային երկրների հանրապետություններում ածականներով հարուստ ռեպորտաժների կառուցումն, անհարկի պատրեոտիզմը, որը հասնում է շովինիզմի, շատ տարածված է։ Դա հատկապես նկատելի է Ռուսաստանում և հատկապես այն լրատվամիջոցների մոտ, որոնք մոտ են իշխանությանը կամ, կարող ենք ասել, պետության կամ խոշոր կորպորացիաների կողմից հովանավորվող են. առհասարակ` ռուսական մամուլն ունի բոլոր այն արատները, որոնք բնորոշ են հետխորհրդային շրջանի մամուլին»:
