Երևանի զորամասերից մեկի հրամանատար, փոխգնդապետ Անդրանիկ Հովհաննիսյանը մեղադրվում է իշխանազանցության, պաշտոնեական կեղծիք կատարելու և առանձնապես խոշոր չափերի յուրացում կատարելու մեջ: Ըստ մեղադրանքի` 39-ամյա Անդրանիկ Հովհաննիսյանը 2,5 տարվա ընթացքում մոտ 14 միլիոնի դիզվառելիք է յուրացրել` լինելով զորամասի նյութական պատասխանատու:
2010թ. հունվարից մինչև 2012թ. մայիսը զորամասի բնականոն գործունեությունն ապահովելու և մարտական առաջադրանքները կատարելու համար Անդրանիկ Հովհաննիսյանի ղեկավարած զորամասին պաշտպանության նախարարությունը հատկացրել է դիզվառելիք, որոնք հրամանատարը հաշիվ-ապրանքագրերով ստացել է ՊՆ 3 զորամասերից: Սակայն իրեն վստահված առանձնապես խոշոր չափերի` 23.320կգ. 13.992.000 դրամ արժողությամբ ավտոբենզինը յուրացրել է զորամասին պատկանող տարբեր ավտոմեքենաների 126 ուղեգրերում կեղծիք կատարելով, ինչպես նաև առանց անհրաժեշտության անհիմն ուղեգրեր կազմելով, նշելով անհիմն երթեր, որոնց արդյունքում վերը նշված քանակի ավտոբենզինը դուրս է գրվել:
Որպես տուժող ներգրավված է ՀՀ պաշտպանության նախարությունը: Ամբաստանյալի նկատմամբ խափանման միջոց է ընտրվել չհեռանալու մասին ստորագրությունը:
Դատաքննությունն իրականացնում է Ավան և Նոր-Նորք վարչական շրջանների ընդհանուր իրավասության առաջին ատյանի դատարանը:
Հ.Գ. Վերջին երկու տարիներին միօրինակ ձեռագիր է նկատվում ՊՆ նյութական միջոցների փոշիացման առնչությամբ: «Վերևից» ինչ-որ մարդիկ հանգիստ թողնում են, որ մի քանի տարի զորամասերի պատասխանատուներն անարգել յուրացնեն պետական միջոցները` կեղծիք կատարելով…հավանաբար ոչ առանց շահի: Ստուգումներ չեն իրականացնում, և երբ արդեն նյութական միջոցները վերևից ներքև կերած վերջացրած են լինում, ՊՆ-ի բյուջեում էլ միլիոնների ճեղքեր են բացվում և նախարարությունից դուրս նկատվում, տվյալ զորամասից պատասխանատու թույլ օղակ են գտնում, դատում, բոլորի կերածն էլ նրանից բռնագանձում: Ու ամեն ինչ սկսվում է նորից…