Արաբական Միացյալ Էմիրություններում սկանդալային դատավճիռ է կայացվել նորվեգացի կնոջ հանդեպ, որին մեղադրել են անօրինական սեռական հարաբերություն ունենալու մեջ: Մեղադրանքի պատճառը դատապարտյալի հայտարարությունն է, որով նա դիմել էր ոստիկանություն և հայտնել, որ իրեն բռնաբարել են:
Դատարանը 25-ամյա կնոջը դատապարտել է 16 ամսվա ազատազրկման՝ հաղորդում է Views and News from Norway-ը:
Հաղորդվում է, որ կինը Դուբայ է ժամանել գործուղմամբ: Նրան այստեղ բռնաբարել են, որից հետո նա դիմել է ոստիկանություն: Իրավապահ մարմինները մասամբ են հավատացել տուժածին: Նրանք համարել են, որ աղջիկը սեռական հարաբերություն է ունեցել ինքնակամ, ինչը իսլամի օրենքներով համարվում է հանցագործություն: Արդյունքում կնոջը մեղավոր են ճանաչել ոչ միայն ինքնակամ սեռական հարաբերություն ունենալու, այլ նաև ալկոհոլ օգտագործելու և սուտ վկայություն տալու մեջ:
Ներկայում դատապարտյալը փորձում է բողոքարկել դատավճիռը: Նրան բռնաբարող տղամարդը դատապարտվել է 1 տարի 1 ամիս ժամկետով ազատազրկման: