Ինչպես այսօր արդեն հաղորդել ենք, Ռուսաստանի նախագահ Դմիտրի Մեդվեդևը Սկոլոկովո տեխնոլոգիական կենտրոնում կազմակերպել է մեծ հանդիպում լրագրողների հետ:
Այն հարցին ի պատասխան, թե արդյոք հնարավո՞ր է տարբերակ, երբ և՛ Պուտինը, և՛ ինքը մասնակցեն նախագահական ընտրություններին, Մեդվեդևը ասել է, թե ապագայում որոշում ընդունելիս և՛ ինքը, և՛ Պուտինն այնպիսի մրցակցության մեջ կլինեն, որը օգուտ կբերի երկրին: Մրցակցության այն ձև, որը միայն վնասելու է ընդհանուր գործին, Մեդվեդևի համար անընդունելի է, միաժամանակ չի բացառվում հակասությունների առկայությունը, առանց որոնց «ամեն ինչ շատ տխուր կլիներ»:
Մեդվեդևը կրկին վերահաստատել է օրեր առաջ արած այն հայտարարությունը, թե հնարավոր է, որ շուտով ՌԴ նախագահը լինի կուսակցական, սակայն չի մանրամասնել՝ խոսքն ի՞ր մասին է, թե՞ ապագա նախագահի:
ՌԴ նախագահն «Ազատություն» ռադիոկայանի Եվրադատարանի մասին հարցին ի պատասխան ասել է, որ, չնայած այդ կազմակերպության կողմից Ռուսաստանի նկատմամբ ընդունվող՝ երբեմն կողմնակալ որոշումներին, ՌԴ-ն չի պատրաստվում հրաժարվել անդամակցությունից և շարունակելու է կատարել նրա որոշումները:
