Իսպանական Mundo թերթն այսօր հրապարակել է իշխող Ժողովրդական կուսակցության նախկին գանձապահ Լուիս Բարսենասի կողմից գաղտնազերծված փաստաթղթերի նոր խմբաքանակ, որը թեժացրել է կուսակցության շուրջ ծագած սկանդալը: Այս մասին հայտնում է EFE գործակալությունը:
Առավոտյան թերթը լույս է տեսել 16-էջանոց հավելվածով՝ նվիրված իշխող կուսակցության հերթական վարկաբեկմանը: Տեղեկատվության աղբյուր է հանդիսացել կրիչը, որը բանտում գտնվող Բարսենասը երկուշաբթի փոխանցել է քննությանը: Կրիչում տեղ գտած գրառումները վերաբերում են 1990-ականների սկզբից 2010 թվականն ընկած ժամանակաշրջանին:
Համաձայն այդ փաստաթղթերի՝ 19 տարում իշխող կուսակցության «սև դրամարկղով» 8.3 մլն եվրո է անցել: Կուսակցությունը 1996-2004 թվականներին տարեկան ապօրինաբար 600 հազար եվրո է ստացել: Ամենամեծ գումարը՝ մոտ 1.5 մլն եվրո, բաժին է հասել ընտրությունների հարցերով կուսակցական խորհրդական Պեդրո Արիոլեին: Գործող վարչապետն ու կուսակցության առաջնորդ Մարիանո Ռախոյը ենթադրաբար ստացել է մոտ 350 հազար:
