«Ոչ թե գործողությունների պլան է հարկավոր, այլ գաղափարախոսություն, այնպիսի գաղափար, որ բոլոր հայերին կհամախմբի իր շուրջ: Այդ դեպքում հայ ժողովուրդը անհաղթահարելի ժողովուրդ կլինի, որովհետև գաղափարին զենքով, ատոմային ռումբով անգամ չես կարող հաղթահարել: Այս մասին «Առաջին լրատվական»- ի հետ զրուում ասաց Արմենակ Կյուրեղյանը՝ հավելելով, որ այն հարցերը, որ բարձրացրին «Սասնա ծռեր»- ը, հայերիս իղձերն են:
Օրերս Անդրիաս Ղուկասյանը առաջարկել էր գործողությունների իր ծրագիրը, նշել էր արտահերթ նախագահական ընտրությունների և վստահության կառավարություն ստեղծելու անհրաժեշտության մասին և առաջարկում էր, որ Հայաստանի և Սփյուռքի համար ընդունելի անձ՝ Շ. Ազնավուրը ղեկավարի վստահության կառավարությունը: Այս դիտարկման վերաբերյալ Արմենակ Կյուրեղյանը նշեց, որ Ա. Ղուկասյանի առաջարկը չի հակասում իրենց գաղափարին. «Եթե դա իրականանալի լինի, կարելի է նաև այդ ճանապարհով գնալ, բայց դա ճանապարհներից մեկն է: Մենք պետք է իմանանք ուր ենք գնում, որ կարողանանք ճանապարհն ընտրել»:
Անդրադառնալով Ծաղկահովիտի ՏԻՄ ընտրություններում «Սասնա ծռեր»- ի անդամ Արայիկ Խանդոյանի թեկնածությանը՝ Ա. Կյուրեղյանը այդ քայլը բնորոշեց որպես հեղափոխության փորձ՝ մեկ գյուղի մակարդակով:
«Անվերջ հանրահավաքաներից ոչինչ չի փոխվում, դրանք զուտ շփումներ են քաղաքական ուժերի և ժողովրդի միջև: Հանրահավաքով բողոքի արտահայտում է լինում, բայց չի լինում համախմբում, չի լինում գաղափարախոսության մշակում: Գոյություն ունեն ոչ հանրահավաքային գործընթացներ, որոնք այժմ ընթանում են: Բնական հրամայական է՝ կա՛մ մենք կմշակենք միասնական ուղղություն, և համայն հայությունը կհասկանա, թե ինքը որտեղից է գալիս և ուր է գնում, կա՛մ կկորցնենք պետականությունը»:
Մանրամասները՝ տեսանյութում:
